Элстд Хальмг олн-әмтнә хуралын дарани биш сүүр болв

Эндр Хальмг олн-әмтнә хуралын дарани биш сүүр болв. Депутатнр 12 төр хәләгдв. Тер тоод давсн жилин полицин көдлмш диглдв, бичкдүдин зөв харслһна тускар күүндвр болв.

Нер туурсн Валентина Юдашкина уйсн региона ах полицейскин шин формд сессин орлцачнр оньган өгсн уга, үг авч келсн саамдан Баатр Гиндеев күч олзлад учрсн йовдлмуд, маши хулхасн, көлгн күч авад зулсн то кесг холванд икдснь темдглв. МВД-н көдлмш илднь кегджәх болв чигн зөв йос харлһна органмудин көдләчнр зака эвдсн арвн һурвн йовдл илткгдв. Әмтнә орулж өгсн хөрн долан минһн эрлһәс орулж өгсн йисн шаху минһнь уголовн керг зөвшәргдсн уга.

Баатр Гиндеевин келсәр, МВД-н коллегин йовудт эн төрәр күүндвр кегдхмн. Гем һарһсн улс көдлмшәсн чигн көөгдх әәмшг бәәнә.

Бичкдүд орлцата хаалһд зеткртә йовдлмудын то һучн йисн процент икдв. Йирн хойр күүкд-көвүд олн-зүсн шав авв. Хойр күн әмнәсн хаһцв. Тер хоорнд соктуһар маши залсн һурвн минһн һар йовдл ГИБДД-н көдләчнр илткв. Профилактическ халхар кегдг керг-үүлдврмүд аш үзүлжәхш. Эн халхар көдлмш харшнгар кегдәх министр Гиндеев бас заав. Күүнә зөв харслһна танһчин аппаратд нидн жил ут тоодан 700 шаху эрлһ орж ирв. Эднә икнкнь жилишн халхар учрдг эвдрлтлә залһлдата. Өнчн болн инвалид көвүд-күүкд бәәх гер уга болжана. Тиим болв чигн давсн жилд хөрн күн гер авв. 156 күүнд дөнцл мөнг йилһж өггдв. Зурһан зун күн болхла гер уга бәәһәд, зовлн үзжәнә. Күүнә зөв харслһна күцц зөвтә элчин келсәр, бичкдүд дунд эврә дурар әмнәсн хаһцсн болн өрк-бүлд күч үзүлдг йовдлмудын то өсәд йовна. Дәкәд болхла, хуучн нурад унжах гермүдәс әмтиг нүүлһнә болн олн давхрта гермүдт ясврин көдлмш келһнә федеральн программар йилһж өггдсн мөнгиг кергтә кевәр эс олзлсна ашт арвн уголовн керг күцәгдв. Энүнә тускар танһчин прокурорин дарук Галина Харашкина келж өгв. Тер мет хулха кесн, әмтнә көлгн-күч авад зулсн йовдлмуд икдв.

Арстана Светлана, Ирчин Алексей