Ода нег минһн көвүд-күүкд эндокринологин тоод бәәнә
Ода нег минһн көвүд-күүкд бичкдүдин эмч эндокринологин тоод бәәнә. Давсн жилин чилгчәр болсн диспансеризацин ашар, танһчин райодын эмчнр дәкәд зурһан бичкдүдт иим эмлһн кергтә гиж илткв. Харм төрхд, эн төриг мана танһчд бас хаһлх кергтә.
Анастасия Ибрагимова эврәннь көвүһән түрүн болж эмч-эндокринологд дахулж авч ирж. Арвн дөрвн наста Равиль көвүнә эрүл-менднь экинь үүмүлв. Тегәд Ик Буурлас иим киитнд эмд одхар адһв. Анастасия Ибрагимован келсәр, сүл цагт уурта болв, мууһар унтна, сүл цагт нурһнь өсжәхш.
Эннь бас учрта, юнгад гихлә көвүнд йод дутжана. Дамшлтта эндокринолог Эльвира Тепкенкиеван келсәр, өдр болһн нааран ирсн танһчин арвн тавн күүнәс арвн күүнд йод дутжана гиж илткгднә. Тегәд чигн олн-зүсн гем ирнә. Иим йод баһ болхла, әмтн күнд чигн гемәр гемтх әәмшг бәәнә. Нег үлү, саата күүкд улст йод эрк биш кергтә. Юнгад гихлә, энүнә төрх үрнд иим элемент бас кергтә болжана. Эмч Эльвира Тепкенкиеван келсәр, ода деерән иим специалистын тоод арвн дөрвн бичкдүд бәәнә. Йод дутжахла, олн-зүсн күнд гем хальдна. Иим бичкдүдин нурһнь мууһар өснә, ухан-серлнь бас сән болхш.
Өдгә цагт хальмгин нег минһн бичкдүд эндокринологин тоод авгдв. Давсн жилд болсн диспанзеризацин ашар болхла, танһчин райодт эмчнр дәкәд зурһан зун иим гемтә бичкддүиг илткж авсмн. Харм төрхд, Хальмг танһчд иим төр ик кезәнәс авн олн улсиг үүмүлжәнә. Хальмгин цутхлнгин биолог Алла Далдандинован келсәр, ода хотл балһснд әмтн уудг уснд йод уга.
Академик Вернадскийн бичсәр, Хальмг танһчин аһуд һазрт болн урһмлд фтор, селен болн йод баһ болжана. Фтор болн селен баһ болхла, әмтнд күнд болна. Йодын дутуг болхла урднь олн-зүсн саглулгч керг-үүлдврмүд күцәһәд, эн төриг хаһлдг билә. Ода болхла эн кергин тускар мартж. Хальмг танһчар Роспотребнадзорин заллтин һардачин дарук Жанһр Санджиевин келсәр, ода Хар hазра, Октябрьск, Лаганск, Яшалтинск болн Городовиковск райодт һазрт, урһмлд, энүнәс көлтә махнд, үснд йод баһ гиж илткгдв. Ода эндокринн системин гемтә улсиг эмнүлхд үнтә болжана.
Йодта давснд йод мууһар хадһлгдна. Тегәд чигн хот кехлә иим давснд йод дарунь уга болж одна. Гигиена цутхлнгин спецалистнрин келсәр, зуг йодта уснд эн халхар сән чинртә болжана. Тегәд йодта ус хулдж авхла сән болх. Тегәд чигн иим ус кедг арлһачнр сән керг күцәжәнә.
Хавтхна Элла, Хулхачин Николай
