Хальмг танһчин спортын туужд түрүн болж Олимпиадын алтн медаль шүүж авгдв. Лондон балһснд болсн һучдгч Олимпийск нааднд художественн гимнастикар багмудын дасхлт келһнә дөрлдәнд Хальмгин спортсменк Алина Макаренко түрүн орм эзлв.
Көтчнрә районд һан халунас көлтә тәрәнә ик зунь хагсад үрж одв. Эн жил районд ут-тоодан зурһан минһн гектарт тәрән тәргдв. Энүнәс дөрвн минһн гектарнь хасгад үрв.
Хальмгин сурһульчнр цугәрәсән президентск спортын марһанд орлцх. Городовиковск дундын школын көвүд-күүкд мана танһчин нер Анапа балһснд харсхмн. Энүнд Әрәсән хамгин сән гисн школмудын командс цуглрх.
Хальмг танчин зарһин приставмуд жил болһн кесг сай арслнг өр некж хазнд орулж өгнә. Эн саамд приставмуд “Энергсервис” компаньд өртә улсин гермүдт одв.Элст балһсна әмтн "Энергосервист" тавн сай арслнг өртә.
Шинкн экләд фермер болжах әмтн күсдундур сай арлснг дөнцл мөнг авхин төлә марһанд орлцж чадхмн. Иим улсиг дөннхин төлә федеральн бюджетас мөнг йилһж өгхин тускар Әрәсән правительств шиидвр батлж авла.
Эндр Хальмг Танһчин спортсменк Алина Макаренко Олимпиадт художественн гимнастикин багмудын марһанд экләд дөрлдхмн. Әрәсән командын товчлгч дөрлдән августын арвн хойрла, Лондон балсһна һучдгч зунын Олимпиадын сүл өдр болх.
Көтчнрә района Һашун Бурһст селәнә хөрн герин улс сүл жилмүдт уудг усн угаһар түржәнә. Уудг ус эдн района цутхлнг селәнәс хөрн дуунаһас зөөж авчана.
Зунын кемд ик халун болад, урһц үрснәс көлтә Әрәсән талдан регионмудла әдл Хальмг танһч шангас дөн күләжәнә.
Олимпийск медаль шүүж авснд цевр цуста ажрһ белг гиж өггдх. Олимпийск нааднд сән күцәмж бәрсн төләд сән тохма ажрһ күрл мөнгн медаль шүүж авсн Мингиян Семеновд бәрүлж өггдх.
Хальмгин государственн университетин улд Конфуцин институтын Китдин келнә лагерь секгдв.
Бичкдүдин садмудт чеерүд удл уга төгсх. Көтчнрә района цутхлнг селәнд шинрүлһнә болн ясврин көдлмшин хөөн дошкольн учреждень секгдхмн. Сентябрин нег шинд нааран йирн тавн көвүд-күүкд ирх.
Хар Һазра района Комсомольский селәнд хойр давхрта гермүд шинрүлж яслһна көдлмш болзгаснь урд төгсв.
Мингиян Семенов Хальмг танһчин Герой. Мингиян Семеновд хамгин өөдән ачлвр — Хальмг танһчин Героийн нер зүүлһхин тускар танһчин толһач Алексей Орлов ирлцнһү зәрлг батлж авв.
Лондон балһснд Олимпиад цаарандан болжана. Эндр Әрәсән гандболистк Өмн үзгин Корейин командла наадхмн. Эннь багин дөрлдәнә хөөн кегджәх түрүн наадн болх. Әрәсән команд эврәннь багдан һурвдгч орм эзлсн билә.
Танһчин школмуд сентябрин нег шинд сурһульчнриг тосж авхар белджәнә. Ода эрдм-сурһулин цуг учрежденьст ясврин көдлмш гүргүдән. Тер тоод иим көдлмш Көтчнрә районд бас кегджәнә.