Хальмг танһчин спортын туужд түрүн болж Олимпиадын алтн медаль шүүж авгдв
Хальмг танһчин спортын туужд түрүн болж Олимпиадын алтн медаль шүүж авгдв. Лондон балһснд болсн һучдгч Олимпийск нааднд художественн гимнастикар багмудын дасхлт келһнә дөрлдәнд Хальмгин спортсменк Алина Макаренко түрүн орм эзлв. Энүг хальмг танһчин әмтн эн өдр цугтан дөннв. Элст балһсна цутхлнг талвнгд олн улс цуглрад, Лондон балһснас кегдсн шуд эфирин сонсхвр ик оньган өгч хәләв.
Элст балһснд правительствин сүүрин ик залд ик телеэкран углж тәвгдж. Мана танһчин гимнасткиг дөннх седклтә цуг әмтн нааран ирәд, дөннж чадв. Тегәд чигн сүүрин зал дарун агчмин зуур дүүрв. Жизель балетын көгжмд мана орн-нутгин гимнастксин үзүлсн дасхл олн әмтнд таасгдв. Тегәд чигн эдн кесгтән альхан ташж байрлв.
Әрәсән хамцу команд алтн медаль шүүж авх гиж олн улс иткж, күләжәсмн. Тер бийнь Алина Макаренко болн энүнлә хамдан дөрлдсн күүкдиг танһчин әмтн ик гидгәр үүмж дөннв. Айса Егорова мана олимпийск чемпионкиг бичкнәсн авн таньнна. Эдн хамдан тренер Людмила Гальченкон һардврт гимнастикин спортар түрүн ишкдл кесмн. Ода болхла Айса Егорова эврән бичкн спортсменскла дамшлтарн хувалцжана. Бичкн гимнасткс ода Алина Макаренког дураһад, энүнәс үлгүр-үзмж авчана. Художественн гимнастикин тренер, Әрәсән спортын мастер Айса Егорован келсәр, бичкн цагтан Алина Макаренкола хамдан олн-зүсн марһанд орлцла. Эн жилин Әрәсән команд хамгин сән. Эднә программ хамгин ке-сәәхн болв гиж Егорова келнә. Би Алина Макаренкола әдл чемпионкин нер зүүх санатав. Алинаг дураһад бас иим үзмж бәрх санатав.
Ода Алина Макаренко зуг арвн долан наста күүкн. Элст балһснд төрәд, өсж боссмн. Гимнастикин секцд дөрвн настадан ирв. Эн бичкн күүкн иргчдән эрк биш чемпионк болх гиж тренермүд нәәлжәлә. Олн-зүсн Әрәсән болн нарта-делкән марһаст түрүн орм эзлдг билә, Сингапур балһснд болсн уйн наста спортсменмүдин Олимпиадт алтн медаль шүүж авла, ода болхла Лондон балһснд бас түрүн орм эзлв. Эн өдр Элстин цутхлнг талвнгд ирсн цуг әмтн ик байрта бәәв, эдн нег негән мана гимнасткин диилврлә йөрәв.
Хальмг танһчин правительствин ахлач Людмила Иванован келсәр, иим сән күцмж бәрснлә танһчин цуг улсиг йөржәнә. Мана спортсменк иим ик диилвр бәрснь хальмгин спортын туужд мөнкинд үлдх.
Лондон балһснас кегдсн шуд эфирин хөөн, Элст балһсна цутхлнг талвнгд ик нәр-наадн болв. Энүнд Хальмгин хамгин сән гисн артистнр, искусствин нертә эрдмчнр Хальмгин түрүн олимпийск чемпионкд нерәдж цуглсрн улст билг-эрдмән тусхаж концерт үзүлв.
Татьяна Дмитриева, Жамбин Дмитрий
