Зарһин приставмуд жил болһн кесг сай арслнг өр некж хазнд орулж өгнә
Хальмг танчин зарһин приставмуд жил болһн кесг сай арслнг өр некж хазнд орулж өгнә. Эн саамд приставмуд “Энергсервис” компаньд өртә улсин гермүдт одв.
Элст балһсна әмтн "Энергосервист" тавн сай арслнг өртә. Эврән бийнь мөнгән эдн өгх сана уга бәәдлтә. Зарһин приставмудын келсәр, энүнд олн-зүсн учрн бәәнә. Харм төрхд, зәрм әмтн мөнгн уга болад, өрән өгч чаджахш. Өртә улсин тоод авгдсн гемтә улсд болн жирһлин күнд бәәдлд туссн әмтнд зарһин шиидврәр өрән данцалһна болзг хооран саагдна. Болв, зарһин приставмудын темдглсәр, олн әмтн өрән данцахар седхш. Тегәд приставмуд ирхиг иим әмтн урдаснь медж күләнә. Үүдән хаачкад, эдн өдр-сө уга нертә кү орулхш.
Эднлә хам-хоша бәәх күүкд күүнә келсәр, гертән бәәв чигн, үүдән секхш. Әрәсән закаһар ода өртә улсин герт приставмуд ямаран өдр болв чигн, өрүн долнас авн асхн арвн час күртл одж чаджана. Зуг эдн ямаран мөнгнә өр данцахин утскар урдаснь иим улст зәнглх зөвтә. Элст балһсна зарһин приставмудын әнгин пристав Айса Мимишеван келсәр, иим закаг зәрм улс күцәнә. Иим әмтн өрән тер дарунь данцана. Талдан улс бултад, патьран талдан улст нәәмәдлһнд өгәд, йовж одна. Болв эднә шин көдлмшәс зәнг ирнә. Өртә әмтн приставмудас удан бултж чадшго.
Шин закаһр өртә улсин зөөриг зарюин приставмуд бичж авна. Кемр эднә заасн болзгт өрән эс данцахла, иим улсин бичж авсн зөөр хулдгдна. Иим кевәр хоршаж авсн мөнгн өр данцалһнд йовулгдна. Зәрм өртә әмтн шишлнг хувц өмссн зарһин приставмудыг үзхләрн үүмәд, өрин тускар тер дарунь тодлж келж өгнә.
Зарһин приставмудын барин церглтин ах спцеиалист Делгр Бодгаеван келсәр, эндр өдрт нег сай арслнг өрн данцагдв, Энергосервист әмтн тавн сай өртә. Иим бәәдл чиклхин төлә дару-дарунь рейдмуд кегднә. Өртә улсин зөөр бичж авад, хулдж кергтә болна. Зуг эннь хамгин чанһ засг болжана.
Элст балһсна көдлджәх улс гертә асхлад ирнә. Тегәд чигн иим кемд зарһин приставмуд гермүд эргж йовна. Тер мет өртә улт көдлмштнь бас зәнг орулж болх. Эс гиж амрлһнд бәәсн әмтнд бас иим зәнг өгч болжана. Нег үлү, өртә улс һазадын ордудт ода шин закаһар һарч йовж чадшго.
Хавтхна Элла Котина Валерий
