Эндр Хальмгин дәкәд нег спортсменк Олимпиадт дөрлдх
Эндр Хальмг Танһчин спортсменк Алина Макаренко Олимпиадт художественн гимнастикин багмудын марһанд экләд дөрлдхмн. Әрәсән командын товчлгч дөрлдән августын арвн хойрла, Лондон балсһна һучдгч зунын Олимпиадын сүл өдр болх. Иргч нарн өдр Хальмг танһчин цуг әмтн мана гимнасткиг дөннх. Хамгин икәр Алинаг энүнә өрк-бүлнь дөннх саната.
Эн зург арвн жил хооран цокж авгдж. Алина эврәннь аав Петр Чавычаловла хамдан хойр минһн негдгч жилд болсн Хальмг танһчин чемпионатд зурган цокулсн билә. Тиигхд Алина түрүн орм эзлв. Би эврәннь ач күүкнтәһән, иргч олимпийск чемпионкла хамдан гиж Петр Петровчи фотозургт бичж. Цөн жил болад Алина Лондон балһснд болжах Олимпийск нааднд Әрәсән нер харсх гиж тер цагт санжасн уга билә. Петр Чавычаловин келсәр, ода Алина багмудын дамшлтын марһанд орлцжана. Урднь онц дөрлдәнд орлцдг бәәсмн. Эннь бас жанһрта болжана. Командын ханьд дөрлдхд күнд болна. Иим марһанд командын гешүн болһн билгән үзүлх зөвтә, нег үлү хамдан нег күн кевтә программан үзүлх кергтә. Эннь хамгин жанһрта. Ик бахмжта бәәнә. Зуг мана өрк-бүлин биш, цуг танһчин бахмж болжана. Эн саамд бас сән үзмж бәрх ицл бәәнә. Командын гешүн болһн тренериг өгсн цуг даалһвриг сәәнәр күцәх зөвтә гиж Петр Петрович келнә.
Художественн гимнастикин секцд Алина дөрвн настадан ирв. Аавиннь тодлврар, тиигхд күүкн цогц-махмудан батрулх гиж секцд орулж. Болв кичәл болһнд цуг даслтыг ик оньган өгч, сәәнәр кехәр зүткдг билә. Петр Петровичин тоолврар, цугәрәсән болн нарта-делкән ик марһаст диилвр бәрхд бат зангта болн көдлхдән дурта күүкнд эннь сән нилчән күргв. Урднь Сингапур балһснд болсн уйн наста спортсменмүдин Олимпиадт орлцла. Ода болхла Лондон балһснд Әрәсән команд диилвр бәрхәр зүткх. Алинаг дөннхәр Элст балһснас энүнә түрүн тренернь Людмила Гальченко Олимпиадт одв. Эн ик чинртә марһанд Әрәсән командын ханьд хальмгин гимнастикин школын сурһульч сәәнәр дөрлдх гиж Гальченко нәәлжәнә. Мана гимнасткиг дөннх санатав. Алинаһас үлгүр авад, бас иигж дөрлдх санан бәәнә. Мана гимнасткин дөрлдәг хәләхәр күләжәнәвидн.
Сүл цагт ач күүкән хая-хая үздг болв гиж Петр Чавычалов келнә. Ода нурһлж телефоһар күүнднә. Эндр болх марһан мана өрк-бүлд йир үүмәтә цаг болхмн. Тегәд энүг тенкән уга гидгәр күләжәнәвидн гиж эн келнә. Петр Чавычаловин келсәр, Мингиян Семеновин сән үлгүриг цааранднь Алина батлх гисн нәәлвр бәәнә. Мингиян сән үзмж бәрв, Алина бас диилвр бәрх зөвтә. Бичкнәсн авн Алина тренерин өгсн даалһвриг гертән чигн кеж дасдг билә. Тегәд сән спортсменк болв гиж аавнь келнә.
Спортсменкин өрк-бүллә хамдан мана танһчин цуг әмтн энүг дөннх. Алина Макаренко иим ик күцәмж бәрсн Хальмг танһчин түрүн гимнастк болжана.
Ээнән Делгр, Хавтхна Анатолий
