Хальмг танһчин толһачин кубок "Экспресс-тур" шүүж авв
Хальмг танһчин толһачин кубокин футбольн марһан төгсв. Товчлгч нааднд Элст балһсна Уралан стадионд “Экспресс-тур” болн “МВД-Динамо” командс харһв. Турнирин йовудт эн хойр коллектив хамгин сәәнәр наадв. Танһчин райодын цуг командас эдн нүүрт һарв. Райодын командс бас товчлгч девснгд орх арһ билә. Зуг Элстихн эн саамд хамгин сән наад үзүлв.
Наадн төгсв. Энүнә ашт “Экспресс-тур” команд диилвр бәрж чадв. Наадна сүл минутд дәкәд нег гол эдн цокж орулж чадв. Аштнь харһлт 2:1 тооһар төгсж. Дииләчнр ик байрта бәәнә. Тегәд чигн спортсменмүд стадионас һархар седжәхш. Экспресс тур дөрв дәкж Хальмг танһчин толһачин кубок шүүж авчана. Эдниг футболд дурта улс халунар йөрәж, эднлә хамдан байрлжана. Энүнә зөөн дииләчнриг болн призермудыг ачлв. Хальмгин толаһчин администрацин һардач Игорь Шалхаков дииләчд кубок бәрүлж өгәд, футболистнриг йөрәв.
Наад хәләхәр ирсн олн улс бас икәр үүмәд, дурта командан дөннв. Стадиона деед үзгин трибунд хамгин олн әмтн цуглрад, сул орм үлдсн уга. Эннь бас учрта. Юнгад гихлә, товчлгч нааднд хальмгин футболын нүүрлгч командс — "МВД Динамо" болн "Экспресс-тур" наадв. Танһчин толһачин кубокин дөрлдәнд нурһлж автомобилистнрин команд түрүн орм эзлдг болв. Эн саамд наадна түрүн өрәлд эдн түрүн болж гол цокж орулв. Специалистнрин тоолврар, иим таалд динамовцнр цуг арһ-чидлән агсж, диилвр бәрхәр зүткх зөвтә бәәсмн. Турнирин ах зарһч Анатолий Учуровин келсәр, ода наадна түрүн өрхлнь төгсжәнә. Динамовцнр цуг арһан агсж, наадыг чиклж чадх арһта.
Товчлгч наад Элст мэрийн толһач Артур Дорджиев ирж хәләв. Футболд дуртав, урднь эврән бас футбол наадг биләв гиж Артур Терекович келнә Элстин мэрийн толһач Артур Дорджиевин келсәр, Элстин хамгин сән гисн хойр команд товчлгч нааднд дииләчән йилһжәнә. Эннь сән зәнг. Футболистнр сән наад үзүлжәнә.
Хальмг танһчин толһачин кубокин сүл наад Элстин администрацин ахлач зуг хоосн хәләхәр ирж уга. Хотл балсһна мэрий шишлнг мөрә тогтав. Артур Дорджиевин келсәр, турнирин хамгин баһ наста футболист Дольган Джимбеевд шишлнг мөрә бәрүлж өгхәр шиидж.
Кубокин марһанд хойрдгч орм эзлсн “МВД Динамо” командын спортсменмүд бас шишлнг дал мөрә авв. Турнирин хамгин сән гисн һурвн футболистын тоод хойр динамовцнр йовна. Хальмг танһчин толһачин администрацин һардач Игорь Шалхаков "Динамо" командын тренер Сергей Подад мөрә болн белг бәүрдж өгв. Игорь Шалхковин келсәр, сүл нааднд хамгин сән футболистнр наадв. Танһчин талдан чигн цуг футболситнрт ирг марһанд сән күцәмж бәрхинь дурджанав гиж Шалхаков келв.
Хальмг танһчин футболистнр дарани дөрлдә төгсәв, удл уга эдн Хальмгин чемпионатын нааднд дииләчән йилһхмн.
Чучян Валентина, Хавтхна Анатолий
