Мана танһчин улсин төлә бәәдг гермүд тосхгдх. Элст балһснд нәәмәдлһнә гермүд бәргдх, олн үртә өрк-бүлмүдин төлә патьрмуд йилһж өггдх. Энүнә тускар эндр правительствин барин церглт зәнглв.

Хальмг танһчин зарһчнр эн жилин зурһан сарин көдлмшин аш диглв. Сүүрт темдглсәр, зарһд хәләгдсн кергүдин то өсв. Зарһин систем шинрүлһнә седвәр мана танһчин улс дөннжәнә. Зарһд олн улс иткл өсв.

Зунын цаг олзлад, хальмгин энергетикүд намрин үвлин кемд белдврин көдлмш күцәжәнә. Ода темдглсн зураһар иим көдлмш тавн участкд кегджәнә. Эднә көдлмш жанһрта болн күнд болдгин тускар бидн икәр ухалхшвидн.

“Терра” нертә крестьянск-фермерск эдл-аху йирн нәәмн сай арслнга льготн кредит авх. Хойр минһн арвн һурвдгч жилд крестьянск-фермерск эдл-аху баһ бизнес болн арһлачнриг дөннлһнә марһа шүүж авла.

Эндр зөв-йос тетклһнә зүүцүлһнә селвлцәнә орлцачнр олн патьрмудта гермүдин заллтин халхд мөнг олзлһиг бүртклһ кесн көдлмшч багин үүлдврин урдаснь кесн ашин тускар келв.

Зунын кемд амрлһна цаг болна. Ода альд амрхин туск төр хурц биш. Урднь һазадын ордудт одад амрхд жанһрта болдг билә. Ода болхла дурта һазрт одад, зуульчлһ кеж болх.

Өмн үзгин болн Ар Кавказин федеральн округст шүлкә гемин халхар хурц бәәдл тогтв. Хальмгин Ик-Буурла, Приютненск болн Хар Һазра райодт харлһна карантинн постмуд тәвгдв.

Элст балһснд өвәрц бичкдүдин плошадк тосхгдв. Эзнә герин нег күн уульнцдан иим плошадк тосхв. Ода Кирбазарная уульнцин көвүд-күүкд санамр ке-сәәхн бәәрнд наадад, амрчана.

Мана партин гешүд шин ухан-саната, шин чидлтә болн шин хәләцтә. Иигж “Партия за справедливость” нертә цугәрәсән политическ партин региональн әнгин гешүд тоолжана. Эн парть мана танһчд эн жилин апрель сард бүрдәгдв.

“Время действовать” нертә керг-үүлдвр төгсв. Танһчин спортын, туризмин болн баһчудын политикин министерствд танһчин керг-үүлдврин аш диглв. Энүнә һол күцлнь — эрүл-дорул кевәр бәәлһнә бәәдл-жирһл тархалһн, баһчудыг олна үүлдврт орулһн болжана.

Эндр асхн Казань балһснд Универсиадын марһан төгсх. Тер бийнь сүл өдр медальмудын нәәмн комплект бәрүлж өггдх. Әрәсән хамцу команд хамгин олн медаль шүүж авв.

Хар Һазра района цутхлнг больницд хойр шин әнг — терапевтическ болн педиатрическ әнгс байрин бәәдлд секгдв. Тер мет танһчин толһачин даалһврар, гостиницин гер шинрүлгдв. Ода энүнд медицинск учреждень бәәршлжәнә.

Әәрмд эс церглсн улс государственн болн муниципальн церглтд көдлж чадшго. Энүнә туск закан Әрәсән президент батлж авв. Закан 2014-гч жилин январинn 1 шинәс авн бәәдл-жирһлд тохрагдхмн.

“Регионы — устойчивое развитие”. Иим нерәдлһтә инвестиционн төсв мана танһчд күцәгджәнә. Элст балһснд арһлачнрин зөвин элч Сергей Нестеров марһанд орлцачнрла харһлт кев.

Эндр Хальмг танһчд догшн һан халунас көлтә бачм чинртә бәәдл зарлгдв. Олн жилдән болжах һан халун агропромышленн компекст му нилчән күргжәнә.