Цергт эс мордсн баһчуд көдлмшт авгдшго

Әәрмд эс церглсн улс государственн болн муниципальн церглтд көдлж чадшго. Энүнә туск закан Әрәсән президент батлж авв. Закан 2014-гч жилин январинn 1 шинәс авн бәәдл-жирһлд тохрагдхмн.

Эн жил Очр Пюрвеев Әрәсән әәрмд церглх зөвтә. Ода баһ наста көвүн деед сурһуль төгсәһәд, юристын эрдм авв. Төрскндән даалһвран күцәхдән белн бәәнә.

Очр Пюрвеевин келсәр, Иргчдән эрдм-сурһуль авхд Әрәсән әәрм сән нилчән күргх. Цергә билет йир сән документ болжана. Энүнә дөнгәр көдлмшт орж болх. Цергт мордх кергтә. Эцкнь болн аавнь цергт церглсмн. Төрскндән бас даалһвран өгх саната.

Эндр өдрт цергт морджах баһчуд дунд школан төгсәсн көвүд болн дунд эрдмин эс гиж деед сурһуль төгсәсн баһчуд йовна. Эдн цугтан цогц-махмудан батрулад, йоста залус болж, цергә билет авх саната. Иим документ угаһар ода государственн церглтд көдлж болшго. Мергн Мергеев һанначин эрдмтә. Эн көвүн техникум төгсәһәд, ода цергт мордх зөвтә.

Мергн Мергеевин келсәр, ода көдлмшч эрдм дасж авсна хөнн цергт церглж болх. Көвүн болһн эрк биш цергт мордх зөвтә.

Эн жил хальмг танһчас дөрвн зун көвүн Әрәсән әәмрд церглжәнә. Эдн цугтан мана танһчла хам-хоша бәәх регионмудт церглжәнә. Эн баһ наста көвүд Дагестанд церглхәр һарч йовжана.

Эн жил цергт мордсн баһчудас хөрн дөрвн процентнь деед сурһульта, Әрәсәд болхла эн кемжән арвн тавн процент тогтажана.

Хальмг танһчин цергә комисасариатын әнгин ахлач Һәрә Сангаджиевин келсәр, сүл цагт баһчуд Әрәсән әәмрд церглхдән дурлжана. Деед сурһуль төгсәсн көвүд көдлмш хәәнә. Болв эдниг цергт эс церглсн төләд көдлмшт авхш. Ода баһчуд эврән ирәд, цергт мордх санаһан медүлнә. Иргчдән цергт церглсн улсиг көдлмшт сәәнәр авхинь меднә.

Өдгә цагин бәәдл-жирһлд эрдм-сурһуль, хамгин түрүнд деед сурһуль ик чинр зүүжәнә. Эрдм-сурһулин системин дөнгәр хамгин түрүнд келн-улсин медрлин көрнг белдгджәнә. Эннь орн-нутгудын болн келн-улсин делгрлтин темдг болжана.

Хальмгин университетин ректор Салан Бадмин келсәр, эн жил университетд оржах баһчуд дундас тәвн долан күн цергәс бууж ирв. Кемр талдан абитуриентла әдл балл авхла, цергт церглсн әмтн деед сурһульд орх льгот бәәнә.

Тер саамд эндр өдрт мана танһчд һурвн зун көвүн цергт мордхар седжәхш. Эдн әәрмәс зулжана. Эдн повестк авчкад, цергә комиссариатд иржәхш. Эс гиж иим повестк цергт мордх көвүдт өгч чаджахш. Эдн нурһлж бәәршлжәх орман сольсн бәәж. Тегәд иргчдән государственн церглтд эс гиж муниципалитетмудт көдлх саната улс оданас авн цергт мордхин тускар ухалх зөвтә.

Баира Петрова, Хавтхна Анатолий