Усна көвәд амрчах улсин төлә шишлнг сурһуль бүрдәж давулгдв.

Хойр минһн арвн һурвдгч жилд хуучн нурад унжах гермүдәс әмт нүүлһнә төлә Хальмг танһч мөнгнә дөн авх регионмудын тоод орв.

“Салют талантов” тиим нертә нарта-делкән фестиваль Испань орн-нутгт болв. Энүнд һурвн тәвн һар үүдәгч коллектив орлцв. Теднә тоод хальмгин көгжмчнр. Эдн долан медаль шүүж авч чадв.

Давсн бембә өдр хальмг танһчд Дала лам гегәнә төрж мендлсн өдр өргәр темдглгдв. Өрүн эртсә авн байрин керг-үүлдврмүд Хальмгин цутхлнг хурлд Бурхн багшин Алтн сүмд эклв.

Эн өдрмүдт Хальмг танһчин олн-әмтнә хуралын депутатнрин кандидатрин спискс политическ партьсин региональн әнгсин конференц болжана. Эн саамд “Справедливая Россия”, “Патриоты России” болн КПРФ-ин патьсин иим хургуд болв.

Элст балһснд эн жилин хаврар һурвн дундур минһн дөрвлжн метрт асфальтн-бетонн хааһлст ясврин көдлмш кегдв.

Пальмовин нертә келн-улсин музейин дүрслгч искусствин сарул ик залд шин экспозиц белдгджәнә. Дүрслгч искусствд дурта хальмгин улсин төлә Астраханск областин зурачнр зургудын өвәрц һәәхүл белдв.

Манһдур нарта-делкән цуг буддистнр арвн дөрвдгч Дала лам гегәнә төрж мендлсн өдр темдглх. Дала лам гегәг буддистнр Арьябал Бурхна хүвлһн гиж күндлнә.

“За перемены” нертә танһчин керг-үүлдврин программар төгрг ширән сүүр болв. Энүнд олн-зүсн эрдмин элчнр орлцад, төрскн кел болн сойл яһж хадһлхин тускар ухан-тоолврарн хувалцв.

Элст балһснд эрүл-менд харлһна цутхлнгин улд тәмк хайх саната улсин төлә школ секгдв. Медицинск цутхлнгин специалистнрин тоолврар, жил ирвәс тәмк татдг улсин тө өсәд йовна.

Эндр Ик-Буурла районд шинрүлһж яслһна өмн ода көдлжәх подстанцс бүртклһнә көдлмшч баг тогтагдв. Иим бүртклһн Ик-Буурла усна сурвлжна насосн станцд завср угаһар электрокүч өглһнә төлә күцәгджәнә.

“Школа безопасности” нертә межрегиональн марһанд Хальмг танһчин сурһульчнр хойрдгч орм эзлв. Эн марһан Адыгея республикин хотл Майкоп балһснд болв. Энүнд Өмн үзгин федеральн округин цуг регионмудын арвн негн команд дөрлдв.

“Ноев ковчег” нертә зунын православн бичкдүдин лагерь Казанкс кафедральн чонжд секгдв. Амрлһна кемд көвүд-күүкд мөргүлд орлцсна, чонжин эргндк аһу цеврлһнә көдлмш күцәжәнә, музеймудт, театрмудт одна, халун өдрмүдт бассейнд өөмнә.

Школын медаль — дунд сурһулиг йилһән сәәнәр сурсн көвүд-күүкдт бәрүлж өггднә. Сүл цагт иим медальмудыг өгдгинь уурулхин тускар зүткәтә күүндвр һарчана.

Жилишн-коммунальн эдл-ахун халх шинрүлһнд дөн күргдг сангин парвлян олн патьрта гермүдт капитальн ясвр келһнә болн хуучн гермүдәс әмт нүүлһнә төлә мөнг йилһж өглһнә эрлһ дөннв.