Казань балһснд Универсиад төгсжәнә
Эндр асхн Казань балһснд Универсиадын марһан төгсх. Тер бийнь сүл өдр медальмудын нәәмн комплект бәрүлж өггдх. Әрәсән хамцу команд хамгин олн медаль шүүж авв. Ода эдн ут-тоодан хойр зун найн медальта, энүнәс өрәлнь алтн медаль. Иим олн медаль Универсиадын туужд нег чигн команд шүүж авад уга бәәсмн.
Эндр Казань балһснд Универсиад төгсх. Әрәсәд болсн оютнрин марһанд Хальмг танһчин спортсменмүд орлцсн уга. Художествен гимнастикин Хальмгин школын сурһульч, олимпийск чемпионк Алина Макаренко Әрәсән хамцу командын ханьд Универисадын марһанд орлцж чадх гиж сүл цаг күртл тренермуд нәәлжәлә. Болв шав авсн күүкн дөрлдәнд орлцж чадсн уга. Тер мет эрүл-менд му болад мана нертә бөк Мингиян Семенов бас эн марһанд орлцсн уга. Хойр жил хооран Казань балһснд тосхгдсн бөк бәрдлһнә бәәшнгд Лондонск олимпиадын призер олн улсин диилв бәрж байрлулх бәәсмн. Энүнлә хамдан хамцу командын ханьд оржах Олег Власов дөрлдәнд орлцад сән үзмж бәрв. Энүнә ноолдаг олимпийск һурвн дам чемпион алдр Александр Карелин ик оньган өгч хәләв. Бөзк бәрлдлһнә марһан сәәнәр бүрдәгдж давулгдв гиж чемпиоан темдглв. Вести-Калмыкия программд өгсн интервьюдан Александр карелин Әрәсән бөкнрин сән дамшлт темдгләд, эдниг буульв. Мингиян Семенов иргчдән улм сән күцәмж бәрж чадх гиж Карелин келв.
Олимпийск һурвн дам чемпион, Государтсвенн Думин депутат Александр Карелина келсәр, Әрәсән чемпионатд Мингиян Семенов яһж ноолхнь медгдх. Йир ик билгтә болн дигтә-дарата көвүн. Ода сән һарт бәәнә. Красноярск балһсна школд дамшлтта тренер Вячнслав Гамзина һардврт белдвр кежәнә. Иргчдән сән үзмж бәрх зөвтә.
Казанск универсиадын бөкнрин марһана сүл өдр Хальмг танһчд спортын делгрлтин төрәр эврәннь зураһарн болн тоолврарн физическ культурин, спортын болн туризмин көдләчнрин профсоюзмудын Хальмг танюһчин организацин ахлач Владимир Бардышев хувалцв. Казань балһсна бөк бәрлдлһнә бәәшнгд хальмгин бөкнр болн спортд дурта улс дутад бәәв.
Физическ культурин, спортын болн туризмин көдләчнрин профсоюзмужн Хальмгин организацин ахлач Владимир Бардышевин келсәр, универсиадын марһанд Жанһр Бачаев орлцхла сән болх билә. Болв тәвн килограммин категорь уга болад, нааран ирж чадсн уга. Долган Салыков бас Әрәсәд нертә бөк нааран ирсн уга. Мингиян Семенов эс ирснь бас һундлта.
Тер мет мана нертә шатрч Сана Сюгировиг дөнндг хальмгин спортд дурта улс йир икәр дутг болв. Ода Липецк областин нер харсжах Санан призермудын тоод орж чадсн уга. Тер бийнь Казань балһснд сән үзмж бәрв гиж эн темдглв. Энүнә келсәр, марһана эклцәр кергтә очко хоршаж чадсн уга. Сүл наадан хальмгин шатрч Польшин элчлә кев. Аштнь диилвр бәрәд, турнирн таблицд му биш орм эзлв. Аштнь Санан Сюгиров йисдгч орм эзлв. Командн марһанд бас призермудын тоод орж чадсн уга.
Универисадын орлцач Санан Сюгировин келсәр, марһана өмн Әрәсән хамцу командал белдвр кев. Цуг шатрчнр сәәнәр наадхар зүткв. Зәрмнь сәәнәр наадв, зәрмнь сән наад үзүлж чадсн уга.
Универсиыдн марһанд волонтермуд йир сәәнәр көдлсинь Санан өөдәнәр үнлв. Хөрн минһн көвүн-күүкн эврә дурар марһана бүрдәһчнрт, спортсменмүдт, тренермудт, журналистнрт болн талдан чигн көдләчнрт нөкд болв. Ода волонтермуд авто болн төмр хаалһин вокзалдмудт көдлжәнә, аэропортд сән дөн күргжәнә. Эдн гиичнриг, спортсменмүдиг болн журналистнриг тосж авна. Тедн уднд мана үүдәгч баг Хальмг танһчин элчиг олж авв. Элстин лицей төгсәсн Роксана Бабакова волонтермудын тоод эврә дурар орв. Иргчдән күүкн Казанск федеральн университетд орх саната. Волонтерск бригадт көдләд, балһснла өөрхн таньлдж чадв.
Универсиадын волонтер Роксана Бабакован келсәр, ода һурвн обьектд нөкд болжана. Эннь күнд атлетик, хоккей болн спортивн комплекст көдлжәнә. Талдан спортд дөн күргх арһ учрсн уга. Универсиад хаалһан байрт орлцх арһ бәәнә.
Түрүн хәләцд эднә көдлмш күнд биш. Зуг эннь түрүн хәләцд. Ода Роксана спортсменмүдт ачлвр бәрүлж өглһнә керг-үүлдврт дөн болжана. Эннь марһана хамгин ик чинртә керг-үүлдвр болна. Роксана медальмудыг тооһарнь авч аһрх зөтвә, цецгүд бәрүлж өглһнә керг бас энүнд медлд бәәнә. Хөрн спортсмен орлцата һурвн командыг нег зергләнд ачлвр авхин төлә һарһж йовулхнь амр керг биш. Энүнд мана үүдәчг баг герч болв. Волонтермудт көдлдмш дала, күн болһн эврә даалһвран күцәжәнә. Эндр асхлад Универсиад байрин бәәлд хаагдх. Эннь ке-сәәхн байр болхмн.
Гюзялян Татьяна, Очра Сергей
