Эндр правительствин сүүрин залд тосхачин сән өдрт нерәдгдсн байрин хург болх. Эн өдр эн халхин нүүрлгч көдләчнриг йөрәх, күндлһнә һашгуд болн ачлврмуд бәрүлж өггдх.

Эндр мана телерадиокомпаньд сунһлһна өмн агитац кех политическ партьсин танһчин әнгст мөнг өгәд эфирн цаг хувалһна тускар жирв хайгдв. Сунһврин өмн күүндврт цугәрәсән политическ партьсин нәәмн региональн әнг орлцхан медүлв.

Баһ Дөрвдә района Тундутово селәнә сойлын гер хамгин сән гисн селәнә муниципальн сойлын учрежденя нер зүүв. Ода мөнгнә мөрә шүүж авад, селәнә сойлын герт ясврин көдлмш кех арһ учрв.

Элст балһснд Хальмг танһч нәәжнртән үрвр кежәнә гисн нерәдлһтә нарта-делкән негдгч фестиваль болх. Энүнд Монһлын, Китдин, Израилин, Туван болн Бурятин бииһин ансамблмуд болн дуучнр орлцә.

Ода танһчин бичкдүдин больницин деед үзгин әнгд шинрүлж яслһна көдлмш кегджәнә. Энүнә ашиг бичкдүд болн эднә эк-эцкнрнь эн жилин чилгчәр үнлж чадхмн.

Приютненск района Октябрьский селәнә улс уудг усар теткгдх. Энүнә тускар "Уралан" агрофирмин директор Магомед Махдиев Хальмг танһчин толһач Алексйе Орловд келсн билә. Ода селәнә бәәрн улс зөөврин усар бәәжән.

Эндр Элст балһснд дәәнә болн күч-көлснә ветеран, РСФСР-ин ачта эмч Петр Жемчуевин бумб байрин бәәдлд секгдв. Эврәннь эрдмин даалһвран сәәнәр күцәсн күүнә санл тевчж, энүг күндлснә темдг болжана.

Тер саамд танһчин бичкдүдин больницд шинрүлһнә ясврин көдлмш гүргүдән. Правительствин барин церглтин зәнглсәр, ода больницин хойрдгч давхрт ясврин көдлмш деед үзгин әнгд күцәгджәнә.

Яшалтинск районас байрта зәнг ирв. Березовское селәнә фельдшерск пунктын коллективд бачм чинртә медицинск дөн күргдг машина түлкүр бәрүлж өгв. Энүнд Хальмг танһчин олн-әмтнә хуралын ахлач Анатолий Козачко орлцв.

Цусан өгәд — талдан улсиг харсж ав. Иим нерәдлһтә цус авлһна керг-үүлдвр болв — Энүг сар болһн бүрдәж давулна. Ода доноромуд дутжана, күнд гемтә улст болхла цусн кергтә болна.

Баһ Дөрвд селәнә хойр хуучн уульнцин бәәрн улс уудг усар теткгдх. Эн байрта йовдлыг эдн дөчн жилдән күләв. Бәәрн улсин бичсн бичгүд, танһчин һардачнрт орулж өгсн эрлһн ода ирж ханһагдв.

Танһчин эрдм-сурһулин, сойлын болн номин министр Лариса Васильеван келсәр, билгтә бичкдүдиг дөннлһнә, иим көвдү-күүкдлә шин эв-арһ олзлж көдлһнә болн баһ наста билгтнрин систем делгрүлһнә зүүцүлһнә хүүв бүрдәлһн билгтә бичкдүдиг илткж.

Элст балһсна цутхлнгд соньн керг-үүлдвр бүрдәж давулгдв. Давсн амрлһна өдрмүдт грэпплингин федерацин спортсменмүдин үзүлврин марһан болв. Эн баһ наста спорт мана танһчд зуг хойр жил хооран экләд делгрлт авв.

Бичкдүдин садмудт чеерүд уга келһн танһчин цуг йосна көдлмшин һол төр болжана. Иргч хойр жилд чеерүд уга кех тодрха даалһвр Әрәсән һардвр өгв.

Каспийск сурвлжна консорциум КТК-н нефтин сурвлжна күчинь икдүлһнә төсв цаарандан күцәжәнә. Эдлвр орулгдх нәәмн нефть гүүлгдг станцас хойрнь Хальмг танһчин аһуд тосхгджана. Дәкәд нег станц өдгә цагт көдлжәнә.