Комсомольский селәнә больницд хойр шин әнг секгдв
Хар Һазра района цутхлнг больницд хойр шин әнг — терапевтическ болн педиатрическ әнгс байрин бәәдлд секгдв. Тер мет танһчин толһачин даалһврар, гостиницин гер шинрүлгдв. Ода энүнд медицинск учреждень бәәршлжәнә. Тегәд района әмтн хол һазрт одлго, цуг кергтә шинжлтд орж чадх. Тенд мана үүдәгч баг көдлв.
Комсомолський селәнә тал дунд бәәх больницин гер шин гер болж үзгднә. Энүнд хойр шин әнг секлһнә байрт эмчнр болн района цутхлнг селәнә бәәрн улс олар цуглрв. Эдн иим байриг ик кезәнәс авн күләжәсмн. Педиатрическ болн терапевтическ әнгс урднь хуучн герт бәәршлжәлә. Эдн санитарн кемжәнлә ирлцжәсн уга билә. Тегәд энүнд капитальн ясвр кех кергтә бәәсмн. Давсн жилд нааран танһчин толһач Алексей Орлов ирсн кемд эн хурц төрин тускар медициснк учрежденя көдлчәнр келсн билә. Танһчин толһач эн төриг удан боллго РМО-н һардврла хамдан хаһлхан медүлв. Тиигхд эн төрәр шиидвр батлж авгдв.
Хар Һазра района администрацин толһач Валерий Бадмаевин келсәр, больниц ямаран таалд көдлжәхин тускар үзчкәд, Орлов даалҺвр өгв. Гостиницин гер хәләһәд, терапевтическ әнгд өгхәр шиидв. Әмтнә бәәдл-жирһл ясрулх кергтә.
Мөнгәр теткх төр хаһлсна хөөн, тосхачнр ясврин көдлдмш эклв. Больнцин гер шинрүлхин төлә арвн сай асрлнг мөнгн кергтә болв. Келхд, ясврин көдлмш ахр болзгт күцәгдв. Лукойл нижневолжскнефть компаня дөнгәр больницин гериг шинрүлж ясх арһ учрв.
Мебель болн шин оборудовань хулдж авхин төлә хойр сай арслнг йилһж өггдв. Иим ик чинртә көдлмш кесн улст хальмгин толһач Алексей Орлов ик ханлтан өргв. Лайф Танһчин толһач Алексей Орловин келсәр, цуг улст, хамгин түрүнд тосхачнрт ик ханлтан өргжәнәв. Нааранг ирсн улс зуг бийән шинжләд һартха. Гемм шалтг уга бәәтн.
Байрин керг-үүлдвр хоосн йөрәләр төгссн уга. Тосхачнрт үнтә белгүд бәрүлж өггдв, района эмчнрт болхла "УАЗ" санитарн шин машина түлкүр бәрүлж өггдв. Тер мет Комсомольский СМО-н ахлачиг бас мөрәлв. Санл Мукубеновд шишлнг шин техникин түлкүр бәрүлж өгв. Энүг танһчин толһачин йилһж өгсн нег сай хойр зун минһн арслнгар хулдж авла. Муниципальн бүрдәцсин марһанд Комсомольское СМО призермудын тоод орла. Эднд Әрәсән Федерацин региональн делгрлтин министерствин күндлһнә диплом бәрүлж өглә. Байрин һол кергнь — шин әнгс секлһнә улан тасм керчв, больницд бичкн экскурсь кегдв. Специалистнрин келсәр, бичкдүдин эмчин кабинет болн бичкдүдин әнг нег герт бәәршлх. Энүнд шин оборудовань углж тәвгдв. Энүнә нилчәр сән чинртә медицинск туслжм авч болх.
Терапевтичекс әнгин һардач Марина Болдыреван келсәр, әнг сән бәәдл һарв. у-сарул хорас. Гемтә улст әнг таасгдх зөвтә. Эднә төлә цуг кергтә туслмж күргх санан бәәнә.
Бичкдүдин әнгин һардач Владимир Кекеевин келсәр, энд цугнь шин. бичкдүдин наадһлан хора бәәнә. Медицинск көдләчнрт шин инструмент хулдж авгдв.
Эн видеозургт болхла Алексей Орлов Хальмг танһчин Герой Лондон балһсна призер Мингиян Семеновла болсн харһлт үзүлжәнә. Мана алдр бөкин төлә тосхсн шин герт эн харһлт болв. Улан тасм керчснә хөөн шин герин түлкүр бәрүлж өггдснә хөөн, гиичнр шин герт орв.
Алексей Орловин келсәр, гертән ирснд байрлжанавидн. Каникулд ирәд, шин бүүрт нүүж орх байр бәәнә. Ода сәәнәр амр. Шин бүүрт нүүж орсн Хальмгин Геройиг йөрәхәр энүнд багшнрнь ирв.
Мингиян Семенов Алексей Орловд эврәннь иргч зуран тускар келж өгв. Цөн өдр болад Польшт нарта-делкән марһан болх, намрар нарта-делкән чемпионатд орлцх.
Чучян Валентина, Хавтхна Анатолий
