Танһчин әмтн альд амрхдан дурта?
Зунын кемд амрлһна цаг болна. Ода альд амрхин туск төр хурц биш. Урднь һазадын ордудт одад амрхд жанһрта болдг билә. Ода болхла дурта һазрт одад, зуульчлһ кеж болх. Элст балһсна әмтн альд амрхдан дурта?
Зунын өрәлнь давж одв. Танһчин зәрм әмтн амрлһна кемән олзлж чадв, талдан улс болхла шинкн амрхар ухалжана. Марина Мацакова эн жил һазадын орн-нутгт одхар шиидв. Эндр танһчин туристическ нег компаньд одад, альд амрхин тускар шүүвр кев. Турцин орн-нутгт долан хонгтан амрх путевк бийдәхн, ээждән болн үрдүдтән хулдж авч. Марина Мацакован келсәр, иим амрлһн энүнә өрк-бүлд йир сән болх. Кесгтән мартгдшго кем болх. Нег үлү эдн түрүн болж самолетар нисх, талын һазрт одх. Келхд, Краснодарск крайин курортмудт амрх путевк һазадын ордудын һазрт амрх путевкин үн әдл болжана.
Марина Мацакован келсәр, ода бичкдүд һазадын орн-нутгт одх өдриг тенкән уга гидгәр күләжәнә. Түрүн болж иим хол һазрт һарч йовх. Ик байрта бәәнә.
Танһчин улсин ик зунь тенгсин көвәд амрхдан дурта. Элсн деер кевтәд, халун нарнд шатхдан дурлжана. Талдан улс болхла, автобусар йовад, олн һазр үзхәр седжәнә. Туристическ фирмин көдләч Церн Бушкиевин келсәр, жил ирвәс зуулһлһна һазр икдәд йовна. Ода танһчин әмтн хамгин олар Египетд, Турцд болн Кипрт амрхдан дурта. Талдан чигн өвәрц һазрт одх улс бәәнә, зуг эднә то бичкн гиж Церн келнә.
Туристическ йирмин көдләч Церн Бушкиевин келсәр, экскурсьт дурта улс Итальд, Испаньд болн Грецд одна. Энүнә төлә виз авх кергтә, шишлнг документ орулж неквр бәәнә. Турцд одсн улс хөөннь Кипрт одх саната. Эн орн-нутгт виз амрар кегднә.
Зәрм әмтн балһснас холд эврәннь дачдан цевр аһар кииләд амрх саната. Талдан улс болхла эрк биш Хар тенгсин көвәд амрхдан дурлна. Тегәхд күн болһн эврә дурарн шүүвр кенә. Хамгин һол төрнь — давжах зун кесгтән мартгдшго йовдл болж үлдх зөвтә. Элст балһсна улсин тоолврар, зунын амрлһна кемиг үрәшгон төләд, ик урдаснь энүнә тускар ухалх кергтә.
Эн күүкд күүнә келсәр, Көк тенгсин көвәд амрхдан дурта. Эн көвүнә темдглсәр, урднь зунын кемд холл һазрт амрад уга, эн жил Хар тенгст одх зура бәәнә. Эн күүкнә келсәр, Европд амрхдан дурлна, тенд бәәцин таал сән. Эн жил Сочи, Геленджик балһсд амрх санан бәәнә гиж эн көвүн келв.
Зун төгстл ода чигн цаг бәәнә. Тегәд альд амрхин тускар ухалж болх. Хамгин һол кергнь — көдлмшин хөөн амрлһан кемд цогц-махмудан батрулж, эрүл-мендән ясрулж, шин чидлтәһәр көдлмштән орхла сән болх.
Ээнән Делгр, Хавтхна Анатолий
