Элстд өвәрц бичкдүдин плошадк тосхгдв
Элст балһснд өвәрц бичкдүдин плошадк тосхгдв. Эзнә герин нег күн уульнцдан иим плошадк тосхв. Ода Кирбазарная уульнцин көвүд-күүкд санамр ке-сәәхн бәәрнд наадад, амрчана.
Хасеин Халадовин келсәр, урднь эн уульнцин бичкн көвүд-күүкд наадх һазр хәәһәд, талдан уульнцд оддг бәәсмн. Тегәд эврәннь һарарн болн эврәннь мөнгәр эднд бичкдүдин плошадк бәрхәр шиидв. Кирбазарная нертә уульнцин бәәрн улс энүнә седвәриг дөннв.
Хасеин Халадовин келсәр, эн һазрт хулд-гүүлгәнә киоск тәвхәр седжәлә. Ода бичкдүд байрта бәәнә. Эдн эврәннь нәәжнрлә наадад шуугна. Асхалд цуһар хәрж одна. Кемр энд вагончик тәвсн болхла, амр уга болх бәәсмн. Баһчуд олар цуглрад аля-азд көөх билә.
Эк-эцкнрин келсәр, эднә гермүдин өөр бичкдүдин плошадк бәрснә хөөн, санамр-төвкнүн болв, хамгин һол төрнь — бичкн көвүд-күүкд икәр байрлжана. Нег үлү, эн районд бичкдүдин плошадк амрлһна ор һанцхн бәәрн болжана. Дөрвн үртә Юлия Хорошилован келсәр, сурһульчнрин зунын амрлһна цагт болн бичкдүдин садмуд ясврт бәәсн кемд көвүд-күүкд энд сул цаган олз-тустаһар давулжана.
Юлия Хорошилован келсәр, эк-эцкнр ик байрта бәәнә. Олн көвүд-күүкд ирж наадна. Эн күн эврәннь мөнгәр плошадк кев. Энд болхла магази тәвхәр седж. Магазин керг уга. Ода плошадкт бичкдүд санамр наадан, бөдүн улс ирәд амрад, хоорндан күүнднә. Эн күүнә келсәр, энд урднь сала бәәсмн, хог-бог асхдг һазр тогтв. Хасеин йир цаһан седклтә күн. Бичкдүдин тускар ухалжана гиж эн келв.
Бичкн Инара күүкнә ээжин келсәр, ода герин терзәс көвүд-күүкд һаза нааджахнь сәәнәр үзгднә. Бичкдүд нег-негән сәәнәр медж авад, өөрхн таньлдв. Гертә бәәһәд, көдлмш кеж болх, терзәр бичкдүдиг бүрткж болна.
Кирбазарная уульнцин бәәрн күүкд күн Мария Содееван келсәр, нааран олн көвүд-күүкд ирнә. Мини ачнр-зеенр энд нааджана. Энд сууһад амрдг таал бәәнә.
Бичкдүдин төлә плошадкт дүүжнг кеж, элсәр нааддг бәәрн бәәнә. Цуг эдниг ке-сәәхн ширәр ширдж. Дәкәд энд тавн дүүжнг углж тәвгдх, футбол нааддг һазр үлдх. Ода шин плошадкт талдан уульнцсин бичкдүд ирж наадна. Уульнцин бәәрн улсин седвәрәр бичкдүдин цуг төрмүдиг хаһлж болшго.
Ода Элтс балһснд бичкдүдин плошадксин ик зунь му бәәдлд тусв. Зеврәд үржәх дүүжнг, шав авх әәмшгтә горкс, хамхржах турник болн талдан чигн хуучн оборудовань бичкдүдт әәмшг учражана. Иим бәәдл хотл балһсна цуг микрорайодт тогтв. Эздүдин гермүд бәәсн һазрт болхла көвүд-күүкд наадг һазр тас уга.
Эн күүкд күүнә келсәр, плошадк кехин өмн магази тәвх эрлһ бичсн бәәж. Тегәд закан энүнә зөв харсх зөвтә.
Сул орм удан эзн уга бәәхш. Һурвн зун дөрвлжн метр һазрин аһуг арһлачнр авхар седж. Бичкдүдин наадлһна плошадкин ормд эдн хулд-гүүлгәнә павильон тәвхәр шиидв. Иим зүткәтә төриг Элст балһсна деед-өмн үзгин районд хотл балһсна администрацин элчнр ирв. Эн төрәр болсн хургт уульнцин бәәрн улсин ик зунь ирв. Эднә тоолврар бичкдүдин плошадкиг көндәх керг уга. Иим шиидвр шишлнг комиссь батлж авв. Ода бичкн көвүд-күүкд наадг һазр бәәнә.
Элст балһсна әнгин ах специалист Светлана Убушаеван келсәр, өдгә цагт иим бичкдүдин плошадк секлһн йир ховр йовдл болжана. Мана хотл балһснд хулд-гүүлгәнә кисокмуд дегд дала. Ода деерән Халадовин медлд эн һазр өгч болшго. Зуг олн улс эрлһ бичхлә, эн һазр олн улсин медлд орх.
Хасеин Халадовин седвәриг хотл балһсна талдан чигн әмтн дөннх гиж сангдна. Тиигхлә Элст балһснд бичкн көвүд-күүкдин төлә өвәрц плошадкс олн болх.
Ээнән Делгр, Бадмаран Владислав
