Нилх төрлһнә то Хальмгт өсжәнә
Хальмг танһчд нилх төрлһнә то өсв. Эн жилин эклцәс авн долан зун бичкдүд төрв. Сүл кесг жилин эргцд төрсн көвүдин то күүкдәс ик болв. Давсн жилд перинатальн цутлнгд хойр минһн долан зун арвн нәәмн нилх төрв, эннь хойр минһн арвн негдгч жиләс һурвн зун бичкдүдт ик болв.
Эн нилхин эрүл-мендин төлә эмчнр энүг төрснәс авн ноолад кежәнә. Көвүн болзгасн эрт төрәд, ода зуг нег килограмм нәәмн зун грамм чиннүртә. Тегәд нилхд өөшгд ки өгхин төлә искусственн аппарат орулж өгв. Энүнә төлә кювез нертә оборудовань олзлна. Энүнд нилх экин гесн бәәснлә әдл таал бәәнә. Болв экин геснд экин зүркнә өөр нилхд бәәсн деер болна. Зуг болзгаснь эрт зурһан долан сарта бичкдүд иим оборудованьд бәәх кергтә болна. Ода больницд саата күүкд улсин әнгд күн дала. Юнгад гихлә, саат күүкд улсин найн процентнь олн-зүсн гемәр гемтжәнә. Энүнәс көлтә бичкдүдин эрүл-менднь му болна. Эмчнрин тоолврар, энүнә һол учрнь — күүкд улсин бәәдл-жирһлин кемжән. Перинатальн цутхлнгин нилхдын реанимацин әнгин һардач Клара Джимбееван келсәр, эрүл-менд экәс эрүл нилх төрнә. Кемр экнь гемтә болхла эс гиж тәмк татад, әрк-чаһр уудг болхла, нилх болзгаснь эрт һарна.
Перинатальн цутхлнгин ах эмч Тамара Ермошкаеван келсәр, иим бичкдүдин эрүл-менднь му, эдниг боожулж авхд күнд болна. Өдртән иим нилхин төлә долан минһн арслнг һарна. Зәрмдән эдниг эмнүлхин төлә зун минһн арслнг кергтә болна. Урднь энүнә төлә мөнгн эрүл-меенд харлһна халх шинрүлһнә программар ирдг бәәсн болхла, эн жил үнтә эм хулдж авхин төлә мөнгн уга болжана.
Перинатальн цутхлнгин ах эмч Тамара Еромошкаеван келсәр, харм төрхд, эн жил эм хулдж авч чаджахшвидн. Юнгад гихлә, эн халхар программ төгсв. Ода зуг төрлһнә счертификатд нәәлх кергтә. Энүнә мөнгәр цуг кергтә эм хулдж авх санан бәәнә.
Энд боожад, батрсн бичкдүдиг нилхдын әнгд орулна. Энүнә хөөн эдниг эк-эцкин һарт даалһна. Специалистнрин келсәр, эннь хамгин байрта кем болна. Өдр-сө уга гилтә нилхиг хәләж, асрад, батрсн бчикдүдиг үзхлә седкл байрлна. Тер саамд одахн төрсн Андрей гер талан һархар белджәнә. Талдан нилхдәс эн көвүн йоста баатрла әдл тавн килограмм чиннртүәһәр төрв. Зоя Бармагнаеван келсәр, Андрей гисн нерн баатр-зөрмг залу күүнә нерн. Көвүнь йоста залу болж өсх гиж нәәлжәнә. Күүкд улс нилх икәр һарһтн. Ода государств эн туст ик дөн болжана.
Сүл цагт көвүдт нурһлж Артем гидг нер өгнә, тер мет Бату гидг нер эк-эцкнр дурлж өгчәнә. Күүкдиг болхла баһ наста эк-эцкнр Виктория эс гиж Александра гиж нерәднә. Дәкәд болхла сүл цагт эк-эцкнр үрндән хальмгин ховр нер өгдг болв.
Элст балһсна ЗАГС-ин әнгин специалист өвәцр болн ховр Эсланда нертә. Энүнә келсәр, иим нертә улс ода күртл харһад уга. Нер ямаран чинртәһинь медхш, зуг иим нерн әмтн соньн болж медгднә.
Ода эк-эцкнр талдан әмтнәс йилһрхәр үрдүдтән ховр болн өвәрц нер өгдг болв. Зуг хамгин түрүнд нилх эрүл-менд төрхин тускар ухалад, экнр урдаснь бийән хәләж батрулх зөвтә гиж сангдна.
Ээнән Ольга, Бадмаран Владислав
