Хальмг келнә марһанд бичкдүдин садмудын көвүд-күүкд орлцв
Элст балһсна нәәмдгч микрорайонд бәәх хөрн нәәмдгч тойгта бичкдүдин садын сурһульчнр хальмг келнә марһанд һол мөрә гран-при шүүж авв. Иим аштаһар Ээжин келн — энкр зөөр нертә хотл балһсна марһан төгсв. Иим дөрлдән һурвн жил дарандан бүрдәгдж, сән зангшалд тохрв.
Жил болһн сурһульчнрин хаврин амрлһна өдрмүдт бичкдүдин болн баһчудын дегтрин долан хонгин керг-үүлдвр болна. Энүг далн жилдән темдглжәнә. Эн керг-үүлдврин программар Амр Санана нертә библиотект хамгин сән умшачнриг ачлв, читаюший класс болн читаюшая семья номинацар ачлвр бәрүлж өггдв.
Библиотекин цутхлнгин һардач Надежда Кетчинован келсәр, келн-улсин библиотект хойр наснас авн арвн дөрвн нас күртл арвн хойр минһн бичкдүд ирнә. Ода энд зун далн минһн дегтр бәәнә, тер тоод Әрәсән болн һазадын ордудын зокьялчнрин үүдәврмүд.
“Самая читаюшая семья” номинацд Мошулдаевихна өрк-бүл диилвр бәрв. Эдн дипломар болн дегтрәр ачлгдв. Зурһан наста
Кармасанан Мошулдаев самолетмудын, машидын тускар дегтрмүд умшхдан дурта. Одахн бичкн көвүн атомин тускар бүкл дегт умшв. Сурһульч Альмина-Мария болхла фантастикин туск дегтрмүдт дурта. Хамгин икәр Елена Вильмондин детективмуд умхдан дурлна. Альмина-Мария Мошулдаеван келсәр, дала дегт умшна. Нәәжнртән умшсн дегтрмүдин тускар келж өгнә. Эднд ямаран дегтр умшх селвг өгнә. Мергн Мошулдаевин келсәр, дегтр умшсн күн гүн медрл авна. Дегтр икәр умшхла, ямаран зург зурхин туск ухан-санан орж ирнә.
Дөрвдгч тойгта школын тавдгч классин сурһульчнр болн хөрдгч школын зурһадгч классин көвүд-күүкд хамгин читаюший класс гиж тоолгдв. Эднд дегтрин торт белглв. Йисн наста Никита болхла “Лучший читатель года” гисн нер зүүв. Библиотект дөрвн настаһасн авн ирдг болв. Энүнә тоолврар, цуг нарта-делкә хөрн негдгч зун жилд орсн бийнь, олн әмтн телеүзүлвр, компьютер болн талдан чигн зәнглһнә эв-арһ олзлжасн бийнь, зуг дегтр энүнд йоста байр үүдәнә. Никита Никитин келсәр, дегтрмүд умшхдан йир дурта сурһульд болн бәәдл-жирһлд дегтр сән нөкд болна.
Бичкдүдин дегтрин долан хонгин программар талдан чигн олн-зүсн керг-үүлдврмүд бүрдәгдх зурата. Тер тоод “Земля — наш обший дом”, “Я здесь живу”, и “край родной мне дорог” нертә экологическ болн этнографическ кичәлмүд болх. Тер мет байрин программар литературн көгжмин утренник, дегтрмүдин һәәхлмүд көдлх, олн-зүсн наадн, марһас бүрдәгдх.
Ээнән Делгр, Бадмаран Владислав
