Дулан өдрмүд ирәд, эргндк бәәдлд сольвр орулгджана

Дулан өдрмүд ирәд, эргндк бәәдлд сольвр орулгджана. Эргндән урһмл экләд цецгәржәнә. Дигтә иим цаг зәрм әмтнд му ниилчән күргнә. Кесг әмтн аллергия гемәр гемтнә.

Арвн зурһата Максим көвүн атопическ дерматит гидг гемтә.

Мана көвүн бичкн цагасн авн гемтә болад, наадк күүкд-көвүдлә әдл футбол наадхш, морожен идхш, юнгад гихлә кемржән хот сольгдхла дарунь гемтә гиж эн көвүнә эк келнә. Эрүл-мендиннь бәәдлиг невчк ясрулхин кергт көвүн өдр болһн эм ууна, игәрән-тигәрән һарсн цагтан дангинд эмән авад йовна.

Аллергия гемәс көлтә ямр чигн хотиг болһаж эдлх кергтә. Кемржән цуг тоотиг эс болһаж идхлә, эн гемм астма гемд хүврх әәмшгтә. Зәрмдән гемм баһрад, невчк гиигн болсн болж медгднә. Эмнлһ авдг болвчн, эн гемм бүклдән эдгхг гиж нәәлж болшго.

Эмч-аллерголог Тамара Трипалина келсәр иим гемәс эдгж болшго, юнгад гихлә ода деерән аллергия гемиг эдгәдг эв-арһ уга болж һарчана. Дәкәд болхла иим гемтә улс шишлнг кабинетмудт эмнүлгдх зөвтә. Эндр өдр иим кабинетмуд нурһлж эмнүллһнә цуг цутхлнгудт бәәнә. танһчин бичкдүдин больницд болхла, астма гемин школ чигн бәәнә. Энд эмчнр бичкдүдт болн эднә эк-эцкнрт сүв-селвг өгнә.

Танһчин бичкдүдин больницин ах эмч-аллерголог Любовь Надбитова келсәр, эндр өдр Аллергия, астма гемтә минһн зурһан зун бичкдүд эмчин хәләвр бәәцхәнә. Астма болха хамгин әәмшгтә гемин негнь болжана.

Иим олн гемтә бичкдүд бәәхнь һундлта йовдл мөн. Өдгә цагт 72 бичкдүд бронхиальн астм гемтә. Аллергия гемм болхла нурһлж үйәс-үйд күрдгинь шинжлт үзүлжәнә. Тегәд чигн саата күүкд улс һрк-чаһр уул уга, тәмк тат луга, цевр-цеерәр бәәх зөвтә гиж саглулжана.

Азыда Надежда, Котина Валерий