Яшалтан района цутхлнг больниц федеральн программд орсн бәәнә

Яшалтан района цутхлнг больниц Эрүл-мендин халхар хойрдг жилдән давжах федеральн программд орсн бәәнә. Давсн жил федеральн болн танһчин бюджетас ирсн 70 сай арслнг капитальн ясврин көдлмш күцәлһнд орв. Хойр минһн арһн хойрдгч жилд дәкәд 40 сай арлснг һарһгдх гиж зуралгджана.

Энд нилд төрдг әнг бәәхмн. Өдгә цагт баһмж кех тоот дала гиж Яшалтан района ах эмч Юрий Кикенов мана үүдәгч багла байрарн хувалцв.

Эрүл-менд харлһна федеральн программд орсна ашт давсн жиләс авн больницин зәрм әнгст капитальн ясврин көдлмш эклсмн. Уд луга чсвр төгссн акушерск әнг үүдән секхмн. Терапевтическ әнгд болхла ясвр төгсәд, эмнлһ авчах ус сән таалд бәәцхәнә.

Урд цагт эн әнг зөвәр бичкн билә, хора болһнд әмтн дала болдг билә. Ода болхла, сапрул-сәәхн хорад, санамр амрад, әмнлһ Авчанавидн, мөр үздг һазрнь өдгә цага бәәдллә ирлцжәнә, хот уудг хорань бас цевр-цер гиж Саглара Манжикова келнә.

Инфекционн, хирургическ болн педиатрическ әнгсд зуг косметическ ясвр кегдхмн, юнгад гихлә эн әнгс федеральн программд орсмн биш. Келхд, больниц тосхгдсн 1987-гч жиләс авн ямр чигн ясмвр энд кегдәд уга билә гиж ах эмч Юрий Кикенов келнә.

Эн жилин июнь сард шинрүлгдсн поликлиникин әнг эдлврт орулгдхмн. Өдр болһн энд хойр зун күн ирч эмчнрин дөнг авч чаджана. Ода болхла, терз-үүдинь тәвәд, эргндк һазринь ясх керг үлдсмн. Больниц ясруллһнд орулгджах мөнгн һурвн талас иржәнә. Федеральн, танһчин болн бәәрн бюджетас иржәнә. Давсн жил далн сай арслнга көдлмш күцәгдсмн. Эн 2012-гч жил болхла дәкәд 45 сай арслнг һарһгдхмн.

Кемржән зураһан күцәһәд көдлхлә, бидн цагларн бәәшнгиг эдлврт орулх седклтәвидн. кех-күцәх көдлмш дала гиж Яшалтан района муниципальн бүрдәцин һардач Яков Рерих келнә.

Өдгә цагт больницд 40 сай арслнга шин оборудовань углж тәвгдсн бәәнә. тер тоод реанимобиль, компютерн томограф, рентген-аппарат нань и тоот. Тегәд Яшалтан района олн-әмтн холл йоовл уга эврә райондан кергтә эмнлһ авч чадхмн.

Санкун Кермн, Котина Валерий