Элст балһснд Увш хаана бумб тәвгдх. Энүг Монһлын нертә скульптормуд мана танһчд белглв. Энүнә цуг детальмуд композитас кегдж. Келхд, эн бумб Монһл орн-нутгт тәвсн монументла әдл.

Өнгәр һазрин участк авсн олн үртә өрк-бүлмүдт льгто өггдәд, эдн алв өгх зөв уга болх бәәдлтә.

Көтчнр селәнд шин бичкдүдин сад байрин бәәдлд секгдв. Энүнд зу шаху көвүд-күүкд орж чадх. Энүнә тосхлтд хойр һар сай арслнг йилһж өггдв. Ода шин гер санитарн ццуг некврлә ирлцжәнә.

Келн-улсин иньглтин бичкдүдин фестиваль Элст балһсна һурвдгч тойгта школд болв. Эн форум нарта делкән негдлтин өдрт нерәдгдсн бәәнә.

Элст балһснд сән сән зангшалд тохрсн ах классмудын сурһульчнрин нәр-наадн болв. Бичкдүдин үүдәлтин бәәшнгд хотл балһсна цуг школмудын көвүд-күүкд ирв. Эн саам байри алтн намрт нерәдгдв.

Көтчнрә района селәнә эдл-ахун көдләчнр сән өдрән байрта кевәр темдглв. Энүнә йовудт агропромышленн комплексин делгрлтин халхар бәрсн үзмжин аш диглгдв.

Долан хонг болад шог наадна болн драмин орсин танһчин театр шин сезоһан эклх. Театрин коллектив эврәннь хәләһәчнртән алдр полководец Наполеона жирһлин сүл өдрин туск наад белдв.

Дүрслгч искусствин залд зурач Иван Ковалевин һәәхүл байрин бәәдлд секгдв. Кесг жилдән эн күн Хальмгин государтсвенн зургудын галерей һардла, дарунь Ставрополь балһснд одад, тенд музейд көдлв.

Астраханск областин нег фермас бруцеллез гемәр гемсн хөөдиг болн ямадиг хулха авч. Эн областин нег фермерск эдл-ахуд мал иим әәмшгтә гемәр гемтснь илткгдв. Иим гем күүнд бас хальдна.

Тәмк татдг му авьясла чанһ ноолдан кегдх. Эн туст белдсн закаг Әрәсән правительств дөннв. Шин закана һол күцлнь — тәмкин утанас талдан улсиг харслһна төр болжана.

Элст балһснд эн өдрмүдт Уйн наста харсач нертә түрүн марһана шүүврин девснг болжана. Энүнд хотл балһсна цуг школмудын командс орлцжана.

Эн өдрмүдт мана танһчд “Автобус” нертә саглулгч керг-үүлдвр болжана. Госавтоинспекцин көдләчнр талдан шишлнг органмудла хамдан әмт зөөдг машид бүрткж хәләжәнә.

Тавдгч классин хальмг литературин шин учебник барлгдв. Шин дегтр ке-сәәхн өнгтә. Болв учебникин һол чинрнь — келнә чик болн байн материал олзлһн болжана.

Эндр Элст балһсна спортын бәәшнгд өвәрц шовудын “Крылатая радуга” нертә һәәхүл секгдв. Энүнд Африкин, Азин, Австралин болн Америкин ке-сәәхн шовуд бәәнә. Ут-тоодан цуг нарта-делкәһәс далн шовун һәәхүлд үзж болх.

Хальмг танһчд немшин дууна фестиваль болв. Оютнр болн эрдм-сурһулин учрежденьсин сурһульчнр неш келәр ду дуулсн деерән, талын кел яһж меддгән үзүлв.Фестиваль хәләхәр ирсн әмтн марһана орлцачнриг күләв.