Эн өдрмүдт “Автобус” нертә саглулгч керг-үүлдвр күцәгджәнә
Эн өдрмүдт мана танһчд “Автобус” нертә саглулгч керг-үүлдвр болжана. Госавтоинспекцин көдләчнр талдан шишлнг органмудла хамдан әмт зөөдг машид бүрткж хәләжәнә. Йисн сарин эргцд жолачнрас көлтә мана танһчин хаалһст хөрн тавн зеткртә йовдл учрв, энүнд хойр күн әмнәсн хацһв. Тер тоод Элст балһснд маршуртн автобусмудын залачнр арвн дөрвн зеткртә йовдл учрав.
Эн жилин чилгчәс авн олн-зүсн халхар хаалһин зокал эвдснәс көлтә хойр минһн автобусмудын жолачнр засгла харһулгдв. Тер мет соктуһар маши залдг йовдлмудын то баһржахш. Нег үлү, жолачнр өдр болһн медицинск хәләврт орх зөвтә. Шин зокалар болхла, маршрутд һархин өмн өдрт хойр дәкж өрүн болн асхн эмчин хәләврт орх неквр бәәнә. Болв эн туст статистикин то-диг дегд му.
Хальмг танһчар МВД-н ГИБДД-н әнгин инспектор Евгений Джамбиновин келсәр, соктуһар автобусмуд залсн хөрн дөрвн йовдл илткгдв. Арвн хойр күн шишлнг категорь угаһар йовж, светофорар давж йовдг зокал эвдсн зун һунч нәәмн йовдл учрв, нег минһн долан зун дола дәкж дегд түргәр йовсн жолачнр бәргдв. Эн туст талдан чигн зака эвдсн йовдл бәәнә.
Хаалһин полицин көдләчнрин икелсәр, микроавтобусмудын эздүд ик ору шингәж авхин төлә хаалһар йовлһна зокал медә бәәж эвднә. Тегәд чигн эн өдрмүдт маршуртн автобусмуд орлцата зеткртә йовдлмудын то баһрулхин төлә мана танһчд Автобус нертә саглулгч керг-үүлдврин хойрдгч девснг болжана. Эн керг-үүлдврин түрүн өдрмүдин ашар эн халхар зокал эвдсн кесг йовдлмуд илткгдв.
ГИБДД-н инспектор Евгений Джамбиновин келсәр, “Автобус” нертә операцин һурвн хонгин эргцд тәвн долан зака эвдсн йовдл илткгдв. Арвн долан жолач засгла харһулгдв. Маршрутн автобусмудын жолачнр урдк кевәр кемжәнәс ик әмт зөөнә, йовһн улс йовдг бәәрнд хаалһ өгхш.
Тер бийнь пассажирмудт туслмж күрглһнә эздүдин автобусмудын жолачнр му кевәр көдлжәнә. Күн болһн иим автобусар йовад, эврәннь нүдәрн иим бәәдл үзнә. Ода Элст балһсна мэрийд шишлнг телефон көдлжәнә. Иим телефоһар жиннүләд, элстихн болн гиичнр маршрутн автобусмудын көдлмшин тускар зәнглж чадхмн.
Элст балһсна мэрийн әнгин шинжләч Мацак Малыковин келсәр, сүл сард Элст балһсна мэрийд әмтнәс дөчн эрлһн орж ирв. Эннь нурһлж жолачнр әмтнд шүрүн үг келж керлддг, автобусин салонд көгжмин ә чанһар тәвдг болн дегд түргәр йовдгин тускар элстихн зәнглнә. Ода хамгин сән эс гиж хамгин му экипаж йилһж авлһна керг-үүлдвр Элстин һардвр күцәжәнә.
Онц темдглхд, хойр минһн арвн һурвдгч жилин январин нег шинәс авн Әрәсәд шин зокал орулгдхмн. Ода цуг пассажирск автобусмудт ГЛОНАСС нертә спутникин навигационн систем углж тәвгдх зурата. Тер мет ода зәрм регионмудт машид бүрткж хәләдг шишлнг тахографмуд олзлжана. Элст балһсна мэрийн элчнрин келсәр, өдгә цагт хотл балһсна медлд хаалһс болн светоформуд бәәнә. Тегәд шин техническ систем олзлхд Элст балһсна бюджетд күнд болх.
Бевина Мергн, Бадмаран Владислав
