Элстд зурач Иван Ковалевин һәәхүл секгдв

Дүрслгч искусствин залд зурач Иван Ковалевин һәәхүл байрин бәәдлд секгдв. Кесг жилдән эн күн Хальмгин государтсвенн зургудын галерей һардла, дарунь Ставрополь балһснд одад, тенд музейд көдлв.

Соньн һәәхүлд буддийск шүтәнә зуг нег әнгнь үзүлгджәнә. Ут-тоодан арвн нәәмн зург бәәнә. Түрүн болж иим шүтә Ковалев тавн настадан үзсн бәәж. Православн шажнд шүттг болв чигн, эврәннь нәәждән гиичд одхларн Бурхн Багшин гегәнә, Ноһан болн Цаһан Дәркин, Очр Ваани бурхдын шүтә ик оньган өгч хәләдг бәәж. Хөөннь кесг жил болад, эн халхар олн дегтрмүд умшсна хөөн зурачин эрдм шүүж авсн күн эврәннь үүдәлтән иим чинр орулхар шиидв. Давсн зун жилин найдгч жилмүдт Иван Григорьевич Москва балһсна салонмудт иим шүтә хулдж авад, цуглулдг болв. Йирдгч жилдмүдт болхла хальмгуд эврәннь өрк-бүлин үнтә зөөрән музейд өгсн кемд, эдниг шинрүлх төр тәвгдв. Иим көдлмшиг зурач кедг бәәж. Эн цагин эргцд зурачин хуранһу болн энүнә үүдәврмүд Әрәсән олн һазрт кесг әмтн үзв. Ода болхла Хальмг танһчд үзүлгджәнә. Зурач Владимир Ковалевин келсәр, Дала лам гегән нааран түрүн болж залрж ирсн кемд һәәхүл хәләж. Иим шүтән ик кезәнк зангшалар зургдж гиж келж. Тегәд иим зургуд зурхла хуучн авьяс олззлж энүг үүдәх кергтә.

Ода Ковалев олн-зүсн эрдмтә болн үүлдвртә күн. Түрүн авгтан зургуд зурдг билә, ода болхла графическ көдлмш бас кехдән дурта. Ковалевин үүдәсн бурхдын шүтән төвдин болн монһлын хуучн авьясар зургдж.

Татьяна Эрдниева далдгч жилмүдт Иван Григорьевичин һардврт Хальмгин зургудын галерейд көдлсн бәәнә. Татьяна Эрдниеван келсәр, Иван Ковалев билгтә зурач, эврәннь үүдәлтәрн кесг улс байрлулж йовла. Энүнә һардврт көдлхд соньн болв.

Ода Иван Григорьевич ачта амрлһн бәәнә. Тер бийнь номин шинжлтын көдлмшән хайжахш. Тер мет дурта эрдмән мартлго, зургуд болг графическ үүдәврмүд кежәнә.

Ээнән Ольга, Бадмаран Владислав