Немшин дууна фестиваль Элст балһснд болв

Хальмг танһчд немшин дууна фестиваль болв. Оютнр болн эрдм-сурһулин учрежденьсин сурһульчнр неш келәр ду дуулсн деерән, талын кел яһж меддгән үзүлв.

Фестиваль хәләхәр ирсн әмтн марһана орлцачнриг күләв. Удан боллго дөрлдәнә түрүн орлцач һарч ирв. Кермн Сангаджи-Горяева урднь олн көгжмин марһаст орлцсн бийнь, энд билг-эрдмән үзүлхд үүмжәнә. Хальмг танһчин түрүн фестивалиг Хар Һазра района коллектив секв. Көвүд-күүкд немш кел сәәнәр меддгән үзүлсн деерән, йоста артист болж билг-эрдмән медүлх зөвтә бәәсмн.

Даяна Убушиеван келсәр, немш кел дасхд соньн болна. Нег үлү немшин сойлын тускар бас медж авчана.

Түрүн фестивальд олн баһчуд орлцсн деерән, эдн соньн дуд программдан өрулж. Тер мет марһанд тохнята белдвр кеһәд, өвәрц хувц-хунр уйж белдв, соньн наад үзүлв, талдан чигн өдгәц агин эв-арһ олзлв. Дөрлдәнә орлцачнриг билг-эрдмиг шишлнг жюри үнлв.

Энүнә ханьд ода Хальмгин университетд сурчах немш күүкн Ангелина Райнике йовна. Энүнә келсәр, нег жилин туршарт орс, төвдин болн монһл кел дасх зурата.

Цаһан Амна гимназин сурһульчнр болхла немш кел шинкн одахн экләд дасжана. Эднә келсәр, иим талын кел дасхд өвәрц болна. Немш келнә багшнрин ниицәнә ахлач Галина Менкенован келсәр, иим танһчин фестиваль бүрдәһәд, немш келәр соньмсд дурлж дасжах бичкдүдиг илткж авх зура бәәнә. Немш келн әмтнд кергтә. Әрәсә болн Германь хоорнд ик кезәнәс авн сойлын болн экономикин халхар бат залһлдан тогтсмн.

Хальмгин университетин оютнр болхла немш келнә нилчәр, эн орн-нутгин туужла болн сойлла өөрхн таньлдж чадв. Хальмгин университетин оют Санл Эдеевин келсәр, Германьд одад, тас талдан эв-арһ үзж. Иим эв-арһ мана орн-нутгин методикас икәр йилһржәнә. Тенд кичәлмуд йир соньн кеәвр болна, баһчуд сурһульдан үүдәлтин чинр орулж медрл авчана. Эннь олз-туста болв. Өдгә цагт немшин алдр үүлдәчнр Моцарт, Гете, Бетховен, Бах болн талдан чигн нертә әмтнә келәр баһчуд икәр соньмсдг болв.

Фестивалин орлцачнр болхла, немшин келн-улсин көгжмин тускар сән медрл авв. Бүрдәһәчнрин тоолврар, иргч жилд иим керг-үүлдврт орлцх улсин то ик болх зөвтә. Тер мет баһчудывн билг-эрдм делгрх гиж эдн тоолжана. Германь болн Әрәсә хоорнд ик кезәнәс авн бат хәрлцән тогтсмн. Найдгч жиләс авн немшин университетмудт Хальмг танһчин олн баһчудт сурдг болв. Тенд мана танһчин көвүд-күүкд аграрн эрдмәр чигн деед сурһуль дасжана.

Ээнән Ольга, Котина Валерий