Элстин һурвдгч школд соньн фестиваль болв

Келн-улсин иньглтин бичкдүдин фестиваль Элст балһсна һурвдгч тойгта школд болв. Эн форум нарта делкән негдлтин өдрт нерәдгдсн бәәнә. Сүл жилмүдин эргцд көвүд-күүкд эн марһанд орлцад, Әрәсәд болн нарта делкәд бәәдг келн-улсин авц-бәрциг, туужиг болн сойлыг яһж меддгән үзүлнә.

Иим школьн программд тавдгч классин сурһульчнр түрүн болж орлцжана. Хамдан сурчасн көвүд-күүкдиг ямаран орн-нутгла таньлдулхин тускар тавдгч классихн эврән шүүж авч. Чанһ неквртә жюрила хамдан эднә билгиг эк-эцкнр бас үнлжәнә. Тегәд фестиваль марһанд сурһульчнр ик даавртаһар белдвр кеснь үзгдв. Энүнә йовудт эдн олн-зүсн шүлгүд, дуд дасж авна, кесг орн-нутгин авьяс-зангшалла өөрхн таньлдна, келн-улсин хувц-хунрар болн хот-хоолар чигн соньмсна. Сергиенкон нертә һурвдгч школын директорин дарук Айса Эрендженован келсәр, иим халхар дамшлтын көдлмш кегджәнә. Келн-улсин иньглтин фестиваль сурһульчнр дунд делгрлт авчана. Эн байр негдлтин сән өдрт нерәдгджәнә. Иим кевәр клаас ни-негн болна.

Тогтсн авьясар байр Әрәсән келн-улсин туужин халхас эклв. Тавдгч классин сурһульчнр мана орн-нутгин тускар келж өгв. Энүнә хөөн олра цуглрсн хәләһәчнр болн жюри Куба, Индь болн Нигерин орн-нутгудт соньн зуульчлһ кев. Иим олз-туста экскурсин йовудт бичкдүд енсг сәәхн дуд дуулв, би биилв.

Багшнрин келсәр, фестиваль эврәннь һол күцлдән күрв. Моһлцг һазр деер олн келн-улс бәәдгинь ода дорас өсж йовх хальмгин баһчуд сәәнәр медж авв. Кесг келн-улсин уул авьяс зангшалла, сойлла өөрхн таньлдж чадв. Школын директорин дарук Айса Эрендженован келсәр, ода иим керг-үүлдврин һол күцлнь — бичкдүд хоорндан ни-негн бәәж, талдан келн-улсин элчнриг тевчх сурһжм өглһнә төр тәвгджәнә. Иим фестивальмудын хөөн сурһульчнрин коллектив батрад, ни-негн болдгнь лавта.

Школын байр йир сергмжтә болв. Бичкн цагас авн сурһульчнр талдан келн-улсиг күндлж теслттәһәр бәәдг сурһмж авчана, эврәннь сойларн бахмж кежәнә.

Бевина Мергн, Бадмаран Владислав