Увш хаана бумб Элст балһснд удл уга секгдх
Элст балһснд Увш хаана бумб тәвгдх. Энүг Монһлын нертә скульптормуд мана танһчд белглв. Энүнә цуг детальмуд композитас кегдж. Келхд, эн бумб Монһл орн-нутгт тәвсн монументла әдл.
Эн өдрмүдт бумбин сүүр белдлһнә көдлмш шунмһаһар кегджәнә. Шин бумб Элст балһсна Ленина нертә уульнцин болн Остап Бендерин проспектин керчлһнд углж тәвгдхмн. Скульптурин детальмудыг Монһлас авч ирж. Энүг бәрхин төлә Торһн нутг клубын гешүд мөнгнә тәвц кев. Эн клубын ханьд монһлын торһуд орна. Элст балһсна мэрийн архитектурин әнгин ахлачин үүл даажах Олег Шалхаковин келсәр, хотл балһсна шиидврәр архитектор батлж авгдв. Мошулдаев Баатр Васильевич обьектын чертежмуд кев, бумбин уул тәвхин тускар төсв белдв. Бумб өндртән дөрвн метр һурвн зун йирн сантиметр, бумбин уул һурвн үлү метр.
Өдгә цагт нег минһн долан зун далн негдгч жилд төрскн һазрт нүүж одсн хальмгудын тохма улсин то Монһлд нег минһнд күрчәнә. Эврәннь келн-улсин әрүн зөөр харсж, төрскн һазран талын хортнас сулдхар Увш-хан хальмгудыг дахулж һарсмн. Тиигхд Зүнһарин ханств хоорндан цүүглдәд, китдәс даргдсмн. Тер цагт баһ наста болн тоомсрта хаана һардврт бәәсн Хальмгин ханств нег бүкл орн-нутг мет жирһжәлә. Өөрднр улс йириндән зөрмг дәәчнр болдг мөн. Эдн ик тесслтә болсн деерән, бат дигтә дарата, ик дааврта болн эрк биш диилвр бәрх күцлтә улс билә. Увш хаана зәрлгүд чик кевәр тер дарунь йир даавртаһар күцәгддг бәәж.
Тенгрин уйдл нертә өдгә цагин өөрдин сойлын делгрлтин цутхлнгин толһач Баснг Захаровин келсәр, Увш хан хальмгудын хан. Өдгә цагин некврәр энүнә үүлдвриг үнлж болшго. Баһ наста болв чигн, ик тоомсрта, күндтә толһач болн цергә ахлач бәәсмн. Әрәсән әәрмин ханьд дәәлдснь болн Зүнһарт одсн кемд эннь ил герч болжана. Балхш нүүрин бәәдлиг тоод авч уга. Эннь мана келн-улсин ик һашута туужин халх болв. Энүнд бумб тәвлһн хаана санл мөнкрүлжәх йовдл болжана.
Композитн материалас кесн шин көшә ода күцц цуглулгдв, зесин өнгәр ширдгдж. Цөн өдр болад энүг сүүрт углж тәвх. Шин бумб байрин бәәдлд ноябрин эклцәр секгдхмн.
Ээнән Делгр, Хулхачин Николай
