Уйн наста харсачнрин марһан болжана
Элст балһснд эн өдрмүдт Уйн наста харсач нертә түрүн марһана шүүврин девснг болжана. Энүнд хотл балһсна цуг школмудын командс орлцжана. Команд болһнд арвн тавн-арвн долан наста нәәмн күн орв, тер тоод тавн көвүн болн һурвн күүкн. Дөрлдәнә дииләчнр танһчин марһанд орлцх зөв авхмн.
Хальмгин келн-улсин гимназин команд хамгин түрүнд марһанд орлцв. Олн халхта пожарн эстафетиг эдн хойр һар минутын эргцд давж һарв. Дамшлтта харсачнрин тоолврар, бичкдүдт иим күцәмж йир сән болжана. Көвүд-күүкд ни-негн кеәвр көдлв, күнд шишлнг хувц өмсхд нег-негндән дөн болв. Бичкдүд харслһна костюм, каск болн шишлнг беелә өмсх зөвтә билә. Арвн негн классан төгсәчкәд, Эрнцн Тямисов МЧС-ин Санкт-Петербургин академиьд орж сурх зурата. Энүнә тоолврар, иим марһан сән белдвр болх.
Эрнцн Тямисовин келсәр, энд түүмр унтрадг улсин көдлмш медж болх. Ода деерән эдн зуг иим үүлдврин ул дасжана, тер бийнь эннь йир ик дааврта керг болжана.
Эрнцн хамдан сурчасн көвүд-күүкдлә иим дөрлдәнд кесг дәкж орлцла. Эн жилин зунар эврәннь нәәжнртәһән Өмн үзгин федераль нокругин марһанд һурвдгч орм эзлв. Дөрлдәнд орлцачнрин келсәр, эн жилин марһана даалһвр йир күнд болв. Эн саамд техногенн бачм чинртә бәәдлин таалд хәәврин болн харслһна көдлмш яһж кехән үзүлх зөвтә бәәсмн. Тер мет иим таалд түрүн медицинск дөн бас күргх кергтә билә. Иим даалһвриг келн-улсин хальмгин гимназин команд йилһән сәәнәр күцәв. Эднә команд ни-негн кевәр көдлв. Кесг жилдән хамдан орлцад, дамшлт хоршаж. олн-зүсн марһаст чидлән сөрлә. Урднь иим суврмудар белдвр кедг бәәж, тегәд дегд икәр күнд болсн уга. Командын орлцачнрт эннь шин даалһвр болж медгдсн уга. Бачм чинртә таалд яһж көдлхин тускар меднә. Дөн күләжәсн улст ямаран кеәвр нөкд болхин тускар бас сәәнәр тодлж авч.
Уйн наста харсач нертә марһана йовудт төрскнч сурһмжм бичкдүд авна, бачм чинртә йовдлмудт улст дөн болж чадх, бийән чигн харсж авдг эрдм бәәнә. Элст балһсна мэрийн эрдм-сурһулин заллтин методист Татьяна Манджиеван келсәр, уйн наста харсач нертә түрүн балһсна марһан сурһульчнрт йир олз-туста болжана. Иим дөрлдәнд орлцсн бичкдүд бачм чинртә таалд көдлдг дамшлт хоршана. Иим көвүд-күүкд аля-азд көөхш, дааврта улс болж өснә.
Эндр дөрлдәнд орлцачнр хәәврин болн харслһна көдлмшин чинртә олн-зүсн боомтг давж һардг марһанд дииләчән йилһхмн. Дииләчнр дипломсар ачлгдх, иргч жилин хаврар Элст балһснд болх танһчин марһанд орлцх зөв авхмн.
Ээнән Делгр, Очра Сергей
