Элст балһснд вольн янзар бөк бәрлдлһнә танһчин марһан болв. Энүнд арвн дөрвн чиннүрин категорьт зун арвн һурвн — арвн тавн наста спортсменмүд дииләчән йилһв.

Октябрьск района цутхлнг Ик Царнг селәнә улсиг удл уга цевр сән чинртә усар теткх. Хойр минһн нәәмдгч жилд “Юг России” программар энд усна сурвлжн экләд тосхгдв.

Өдгә цагт күн болһн өөдән эрдмтә юрист эс гиж адвокатд одад, эврәннь зөвән харсж чадшго. Зәрмдән цәәлһвр авсн төлә ик мөнг өгх кергтә болна.

Мана регионд шин министерств тогтагдв. Эннь Хальмг танһчин социальн делгрлтин, күч-көлснә болн улсиг көдлмшәр тетклһнә министерств. Иим сольвр ведомствс шинрүлһнә программар кегдв.

Эн жилин сентябрин нег шинәс авн хаалһар йовлһна зокал эвдсн улсиг чанһ засгла харһулчн бийнь, хаалһст эн туст бәәдл ясржахш. Энүнә тускар статистик ил герч болжана.

Хальмг танһчд баһчудын правительств бүрдәгдх. Министрмүдин кабинетин тогтаврар консультативн орган тогтагдх. Иим бүрдәц олна чинртәһәр үүлдхмн. Баһчудын правительствин гешүд хойр жилдән сунһж авгдх.

Удл уга Октябрьск района цутхлнг Ик Царнг селәнд шин больниц эдлврт орулгдх. Эн байрта зәнгиг района әмтн кесг жилдән күләв.

Тер саамд эрүл-менд харлһна халх шинрүлһнә федеральн программар Хальмг танһчд машинд углж тәвгдсн медицинск цутхлнг ирв. Эннь иим шишлнг хойрдгч автомобиль болжана.

Сентябрь сард хотл балһснд олн улс орлцата керг-үүлдврмүд болна. Зөв-йосна органмуд улсин әәмшг уга бәәлһнә болн диг-дара теткнә. Ода полицин көдләчнр Элст балһсна байрин өдрт белдвр кежәнә.

Элст балһснд Калачинская нертә уульнцд тосхгджах гер удл уга эдлврт орулгдх. Энүнд долан хуучн гермүдәс әмтн нүүж орхмн.

“Голоса золотой степи”. Иим нерәдлһнә нарта-деклән дөрвдгч этнофестиваль Әәдрхн балһснд болв. Энүнд олн келн-улсин элчнр ирж орлцв. Хальмг танһчас фестивальд Гнесинихна нертә көгжмин Әрәсән академин оют Диана Босхомджиева билг-эрдмән үзүлв.

Хальмг танһчд тутрһ хуралһна көдлмш цаарандан кегджәнә. Октябрьск районд тутрһ урһаж авлһн селәнә эдл-ахусин һол керг болжана. Эн жил тутрһин сән урһц хураж авх зура бәәнә.

Элст балһснд багшнрин төлә шин гер тосхгджана. Энд патьрмудын үн талдан тосхлтын компаняс зөвәр кимд. Тавн давхрта гер нурһлж белн болв. Октябрь сард нааран әмтн нүүж орх.

Хальмг танһчин олн-әмтнә хуралын депутатнрин болн Ик Чонса СМО-н депутатнрин сунһврт цуг сунһачнрас дөчн нәәмн һар процентнь дууһан өгв. Энүнә тускар эндр пресс-конференцд танһчин с унһлһна комиссин ахлач Александр Дикалов зәнглв.

Эндр “Россия 10” марһана сайтд дууһан өглһн дәкнәс эклв.