Ик Царнг селәнд шин больниц тосхгджана
Удл уга Октябрьск района цутхлнг Ик Царнг селәнд шин больниц эдлврт орулгдх. Эн байрта зәнгиг района әмтн кесг жилдән күләв. Йирн һурвдгч жиләс авн медицинск учреждень бичкн болн уутьхн обшежитин герт бәәршлв. Шин медицинск обьект секхлә, района әмтн ик чеерүдт зогслго, сән чинртә туслмж авч чадх.
Уутьхн коридормуд, бичкн палатмуд, бәәцин таал бас уга. Урднь бәәсн обшежитьд гемтә улсиг эмнүлдһг таал уга герт Октябрьск района больницин эмчнр гемтә улсиг шинжлж хәләжәнә. Иим бәәдл энд йирн һурвдгч жиләс авн тогтв. Хойр минһн нәәмдгч жилд медицинск учреждень Юг Росси нертә шишлнг федеральн программд орв. Энүнә нилчәр больницин шин гер экләд тосхгдв. Энүнә төлә зун тәвн йисн сай арслнг йилһж өггдв. Энүнә нег зун арвн негн сай арслнг олзлгдв.
Тосхлтын компаня прораб Бата Нимеевин келсәр, ода зуг шалдарин болн ширдлһнә көдлмш үлдв. Шин терз-үүдн тәвгдх, линолеум делгх кергтә. Ода усна сурвлжн, канализац болн дула өглһнә систем кегджәнә. Эн көдлмш октябрин долан күртл төгсх. Дула өглһнә кемд больницд дулан өггдх.
Шин больницин стационарт дөнч күн бичән эмнүлж чадхмн. Тер мет энд бичкдүдин, хирургическ болн терапевтическ әнгс көдлх. Больницин хуучн гер шинрүлж ясгдх. Ода хуучн гер шин герлә дулан коридорар залһлдата. Ода танһчин эрүл-менд харлһна министерствд района медицинск учрежденьд шишлнг кергтә оборудовань хулдж авх төр хаһлгджана.
Октябрьск района больницин ах эмч Баатр Ходжаевин келсәр, обьект тосхгджана. Удл уга тосхлтын цуг көдлмш төгсх. Медицинск оборудовань хулдж авлһна төр ик кезәнәс авн хаһлгджана. эн жилин эклцәр ямаран оборудовань кергтәһинь министерствд бичж өглә. Тер мет мебель бас хулдж авгдх. Цуг төрмүд хаһлгдх зөвтә.
Шин больнициг эн жилин декбюарин хөрн тавнд эдлврт орулх зура бәәнә. Энүг бәәрн әмтн ик кезәнәс авн күләжәнә. Эн залу күүнә келсәр, шин эмнүлин учреждень тосхснь ик байр үүдәжәнә. Шин больниц эдлврт орхла, чеерүд уга болх. Гемтә улст бичнән эмнүлхд цуг таал энд бүрдәгджәнә гиж залу күн келнә.
Шин больницин герт у-сарул кабинетмуд, дула өглһнә шин систем углж тәвгдв, усна сурвлжн татгдв, канализац бәәнә. Тегәд Октябрьск района больницд гемтә улсиг эмнүлхин төлә цуг таал бүрдәгдх, медицинск көдләчнрин көдлмш сән таалта болх.
Елена Алексенко, Хавтхна Анатолий
