Экологическ субботник эклв
Элст балһснд болн Целинн районд Экологчиеск субботник нертә цугәрәсән керг-үүлдвр эклв. Энүнд муниципальн церглтсин болн ведомствсин көдләчнр орлцв. Троицкое селәнд эн керг-үүлдвр района далн тавн жилин өөнлә ирлцүлж кегдв. Элст балһснд закаһар эс темдглсн һазрт хог-бог һарһж хайхла иим улс ял өгх.
Района ончта өөнд нерәдж далн тавн өөшг цецгүд тәрх шиидвр авгдв. Иим күцл өмнән Целинн района администрацин көдләчнр тәвв. Эдн субботникин йовудт эргндк аһу цеврлсн деерән, энд урһма мод суулһжана.
Целинн района администрацин толһачин Виктор Джанджиевин келсәр, района цуг учрежденьс-предприятьмуд субботникд һарв. Ода бәәрн улст зәнг өгчәнә. Энтн намрин эклц. Иим көдлмш района ончта өөнд белдлһнә программар кегджәнә. Октябрь сард Целинн района далн тавн жилин өөнән темдглх.
Целинн районд субботкникүд сән зангшалд тохрв. Энүнд ик баһ уга көдләд, төрскн селәһән кеерүлнә.
Целинн РМО-н администрацин специалист Роксана Бурвяшован келсәр, Арлтан көвүнтәһән хог-бог хураж авлһна көдлмш кежәнә. Эктән нөкд болжана. Селәһән кеерүлһнд көвүнь бас эврә тәвцән орулжана.
Муниципальн цуг бүрдәцин болн олн-зүсн ведомствин көдләчнр эн өдр субботникд һарад, эднә медлд бәәх аһу сәәхрүлж кеерүлв. Келхд, селә цеврлһнә көдлмш дарук долан хонгт бас кегдх. Иим көдлмш района ончта өөнд бедлһнә программар күцәгджәнә.
Эн залу күүнә келсәр, көдлмш таасгджана. Эднә учрежденя цуг көдләчнр көдлмшт һарв. Селән цевр болх зөвтә. Эн селәнд бидн бәәнәвидн, тегәд иим көдлмш кергтә гиж эн күүкд күн келв.
Района эрдм-сурһулин заллтин специалистнр болхла түрүн багшд нерәдгдсн бумбин өөр цеврлһнә болн кеерүлһнә көдлмш кежәнә. Цөн өдр болад багшин сән өдр темдглгдх.
Целинн РМО-н эрдм-сурһулин заллтин ахлачин дарук Эльза Чульчаеван келсәр, бумбин эрнгдк аһу цеврлх шиидвр авгдв. хашаһинь ширджәнә. Эргндк аһуд урһсн ноһа хадж авх кергтә.
Тер мет эн өдр Элст балһсна церглтсин көдләчнр бас субботникд орлцв. Зун күн төмр хаалһин өөр бәәх аһу цеврлв. Эдн тавн дуунад өргндән хойр зун метрт тосхлтын болн бәәцин хог-бог хураж авв.
Эн күүкнә келсәр, иим керг-үүлдврмүд кергтә. Тиигхлә балһсн цевр болх. Нааран ирсн гиичнрт бас сән болх. Хотл балһсна цуг улст дуудвр кежәнә. Энкр балһсан кеерүлж авх кергтә. Хотл балһсн цевр болн сәәхн болх зөвтә.
Хог-бог заагт олн-зүсн документмуд, эд-таврин чекмуд болн бичгүд бәәж. Ода административн-техническ бүртклһнә әнгин көдләчнр эднә хайгар болн нер-усар хог-бог хайс улсиг ялд унһаж чадх. Балһсна эргндк аһу бузрдасн улс хойр дундун минһн арслнг ял өгх зөвтә, юридическ улс болхла хөрн минһн арслнг ялд унхмн. Келхд, хотл балһсна муниципалитетын чидләр эн жилин эклцәс авн хог-бог зака эвдж хайс хөрн тавн һазр цеврлгдв.
Элст балһсна администрацин әнгин ах специалист Марина Пелих келсәр, иим улсин тускар документ административн комиссьт йовулгдх. Иим комиссь шишлнг протокол кеһәд, эн улсиг ялд унһах зөвтә.
Экологическ субботник цугәрәсән керг-үүлдвр болжана. Энүнд цугәрәсән регионмуд орлцжана. Энүнә һол күцлнь — мана орн-нутгт экологин бәәдл ясрулһн болжана. Ода иим керг-үүлдвр Целинн районд болн Элст балһснд эклв. Удл уга субботникүд талдан чигн райодт болх.
Елена Алексенко, Хулхачин Николай
