Күч әрвлһнә танһчин программар Яшалтинск районд художественн школын болн бичкдүдин иүүдәлтин цутхлнгин гермүд автономн дула өглһнә системд орулгдв. Района эрдм-сурһулин учрежденьст дула өглһнә систем шинрүлһнә төлә ик көдлмш күцәгдв.

Хальмгин селәнә эдл-ахусд хөөдин хурһд хулдж авлһна болн искусственн көг тәвлһнә төлә данцалһна мөнгн йилһж өггдх. Энүнә тускар правительствин барин церглт зәнглжәнә. Дөнцл мөнгн малчнрт танһчин бюджетас һарһж өггдх.

Танһчин социальн обьектмудыг автономн дула өглһнә системд эн жилин чилгч күртл орулһна төлә Хальмг танһчин правительств йирн һурвн сай арслнг йилһж өгх зөвтә.

Олимпийск көрнгин бичкдүдин танһчин спортивн школын сурһульч Пенза балһснд болсн зурһадгч Әрәсән зунын спартикиадт алтн медаль шүүж авв. Энүнд хөрн долан спортар дөрлдән болв.

Ода танһчин малчнр “Алтн намр” нертә Москвад болх агропромышленн һәәхүлд белдвр кежәнә. Хальмг тохма мал келн-улсин бахмж болжана. Тегәд чигн Әрәсән болн танһчин һардачнр эн халх делгрүлһнд ик оньг тусхажана.

Танһчин эрдм-сурһулин учрежденьст сурһулин шин жил цаглань эклв. Цуг школмудт болн бичкдүдин садмудт көвүд-күүкдин төлә сурһулин болн бәәцин сән таал бүрдәгдв. Капитальн ясвр кегдв, шин оборудовань хулдж авгдв.

Эндр танһчин толһач Алексей Орлов Калачинская нернтә уульнцд тосгджах герин улсла харһлт кев. Тосхлт дегд түргәр кегджәхәс иштә көдлмшин чинр му болх гиж герин эздүд үүмжәнә.

Эндр Элст балһснд Хальмг танһчин олн-әмтнә хуралын дарани биш хойрдгч сессин сүүр болв. Хальмгин парламент тогтв гиж келж болх. Эндрк сүүрт бүрдәмжин төрмүд хаһлгдв.

Элст балһсн зун дөчн жилин өөнин байриг өргнәр темдглв. Хотл балһсна цутхлнг талвнгд, Иньглт паркд болн талдан чигн бәәрнд байрин олн-зүсн керг-үүлдврмүд болв. Тер мет эн өдр ке-сәәхн карнавал болв.

Давсн амрлһна өдрмүдт бөк бәрлдлһнә академьд танһчин кесг дам чемпион Канур Адучиевин санлд нерәдгдсн уйн наста бөкнр дунд греко-римск янзар бөк бәрлдлһнә марһан болв.

Хойр дам байр болв. Сарпинск района цутхлнг Садовое селәнд бичкн чонж — часовнь байрин бәәдлд секгдв.

Федерация Синкиокусинкай Калмыкии нертә олна ниицән жирһлин күнд бәәдлд туссн бичкдүдиг дөннлһнә төлә күсдундур сай арслнг йовулх. Нарта делкән классин спортын мастер Марина Анфимован проектиг буйнч седклин сан дөннв.

Эн өдрмүдт Яшалтинск района тәрәчнр намрин тәрә тәрлһнә көдлмшән эклв. Ут-тоодан районд һучн хойр минһн гектарин аһуд цаһан һуйрин буудян экн тәргдх.

Удл уга Баснга Баатрин нертә Хальмгин келн-улсин театрт Азербайджана ТЮЗ театр билг-эрдмән үзүлх. ТЮЗ-театрин гастрольн афишт сүл жилмүдт белдсн хамгин сән наад орв.

Манһдур Элст балһсн зун дөчн нәәмдгч өөнән темдглх. Хотл балһсна улсин болн гиичнрин төлә ке-сәәхн шоу, карнавал, ретро дискотек болн талдан чигн байрин керг-үүлдврмүд бүрдәж давулгдх.