Эрүл-менд харлһна халхар шин оборудовань ирх
Тер саамд эрүл-менд харлһна халх шинрүлһнә федеральн программар Хальмг танһчд машинд углж тәвгдсн медицинск цутхлнг ирв. Эннь иим шишлнг хойрдгч автомобиль болжана. Энүнә дөнгәр танһчин әмтн эмчин шинжлтд орад, кергтә медицинск дөн авч чадх. Келхд, шишлнг медицинск автомобиль танһчин райодра темдлглсн зураһар һарч йовжана. Иим зуран тускар танһчин эрүл-менд харлһна министерствин сайтд умшж болх. Энүнә тускар эрүл-менд харлһна болн социальн делгрлтин министр Владимир Шовунов зәнглв. Энүнә келсәр, удл уга танһчин больницд офтальмологическ әнгд өөдән чинртә операц кеж болх. Тер мет удл уга энд зүркнд операц бас кеж болхмн. Энүнә төлә кергтә оборудовань хулдж авгдв. Ода өдгә цагин некврлә ирлцәтә операц кедг герт ясврин көдлмш кегджәнә. Министрин тодлулсар, грипп гемәс саглулһна тәрлһн мана танһчд цаарандан кегджәнә. “Гриппол” нертә түрүн эм бөдүн улст тәргдв, бичкдүдин төлә эм цөн өдр болад ирх.
