Хальмгин театрин коллектив шин соньн наад эн жил үзүлх
Баснга Баатрин нертә Хальмг танһчин драмин театрин коллектив эн жил хойр шин наад белдв. Эннь Алексей Балакаевин бичсн “Мини зарһим эврән кетн” нертә наадн болн Александр Островскийн үүдәсн “На всякого мудреца довольно простоты” нертә спектакльмуд хәләж болх.
Балакан Алексейин бичсн “Мини зарһим эврән кетн” нертә наадн хальмгин литературин сангд оржах үүдәвр болжана. Бальджирман һол дүриг келн-улсин драмин театрин артистк Марина Кикеева нааджана. Келхд, профессиональн сценд иим дүр түрүн болж үзүлжәнә. Шин көдлмш эклхин өмн оньдин үүмнәв гиж артистк келнә. Нег үлү, сцен деер ор һанцхарн наадна. Иим дүр наадхд йир дааврта болна гиж Марина келнә. Театрин артистк Марина Кикееван келсәр, эн нааднд күүнә жирһлин хаалһин тускар гүн ухан тунһагджана. Күн болһн минь ода жирһх зөвтә. Эннь наадна һол ухан болжана. Эс кеж-күцәсн ашин тускар бас ухалх кергтә гисн сурһмж өгчәнә. Энүг хәләһәчнр медүлх саната.
Режиссер Сергей Бурлаченко келсәр, иим наад тәвх сана ник кезәнәс авн толһад орла. Наадн йир соньн. Тегәд энүнә янзинь хәәж олж авх кергтә болв. Балакан Алексейин дегтр барас һарсн хөөн, энүг олн умшачнр дурлж умшдг болв. Энүнд нег күүкд күүнә дурна тускар келгджәнә. Бичкн күүкн цагас авн энүнә бүкл жирһлин хаалһин тускар келгджәнә. Режиссер Сергей Бурлаченко келсәр, ямаран чигн үүдәвр умшсн цагт, һол дүриг кен наадж чадхин тускар ухална. Энүг Марина хамгин сәәнәр наадж чадх гисн санан орв. Тегәд чигн эн туст икәр алмацсн уга.
Театрин талдан сценд болхла Александр Островскийн үүдәсн “На всякого мудреца довольно простоты” нертә наадна текстиг артистнр дасжана. Энүг түрүн болж артистнр мартын чилгчәр үзүлх. Энүнә төлә баһ наста болв чигн, Әрәсәд болн һазадын ордудт нер туурсн режиссер Евгений Зиминд ирж көдлх үрвр кегдв. Энүнә келсәр, эн нааднд ик кезәнәс авн дурта. Энүг умшад уха тунһана. Режиссер Евгений Зимина келсәр, олн әмтн меддг үүдәвр тәвхлә, шин хәләц олзлх кергтә. Иим үүдәвр белдсн цагт шин эв-арһ олзлжахан ухалад, көдлхлә, урмд ирнә. Урднь сцен деер үзәд уга тоот олж авсн болж медгдв.
Александр Островскийн бичсн үүдәвр шогта-инәдтә гүн ухата пьес болжана. Режиссер Зимина тоолврар, наадн шог-инәдтә болв чигн, энүнд гүн ухан-санан бәәнә, мана өдгә цагин бәәдл-жирһллә ирлцжәнә. Егор Глумовин һол дүриг баһ наста актер Эрнцн Авяшкиев үзүлжәнә. Энүнә келсәр, режиссерин орулсн ухан-санан соньн болж медгдв. Актер Эрнцн Авяшкиевин келсәр, Островскийн бичсн текст йир сән. Шогта-инәдтә. Ода энүг бидн шинжләд, бийдән шин тоот олж авчанавидн.
Театрин художественн һардач Борис Манджиевин келсәр, эн жил Балакан Алексейин үүдәсн пьесмуд тәвх зура бәәнә. Февраль сард нертә бичәчин найн тавн жилин өөнд нерәдгдсн танһчин фестиваль болх. Улан Барбаевна Лиджиеван зун жилин өөнд “Мана Улан” нертә наад белджәнә. Энүнд артисткин адрута жирлһин хаалһин тускар келгдх.
Театрт дурта улст соньн наад белдгджәнә. Энүнд мана бәәдл-жирһлин тускар, күн болһнд учрдг йовдлмудын тускар келгдх.
Ээнән Делгр, Бадмаран Владислав
