Сурһульчнр тимуровск отряд бүрдәв

Хаврин амрллһна өдрмүдт бичкдүдин үүдәлтин бәәшнгин ул деер бичкдүдин лагерь бүрдәгдж көдлжәнә. Эн лагерьт балһсна школмудын көвүд күүкд орлцжана. Эн жилд амрллһна лагерь “Тимур болн энүнә үүрмүд” гиж нерәдгджәнә. Эн керг үүлдврт орлцсн баһчуд дәәнә болн күч көлснә ветеранмудт, бичкдүдин гермүдт бәәх көвүд күүкд дөн нөкдән күргжәнә. Эндр эдн медико социальн инвалидмудын цутхлгин багшнрт нөкд болжана. Шидр эн цутхлнгд капитальн ясвр кегдсн билә, болв тосхлтын хог богиг эн цутхлнгин көдләчнр эврә арһарн хураж авч чадсн уга. Тегәд тимуровцнр тосхлтын хог-бог машинд ачад зөөж һарһв. Өдгә цагт тимуровск жисәнә һол зөрүлтнь — волонтермудын үүлдвр делгрүлһнә, сойлын болн социальн халхсар хоорндан нөклт келһнә төрмүд тәвгджәнә.