Ким Ольдаевин һәәхүл секгдв
«В их лицах отражен 20 век» нерәдлһтә һәәхүл Пальмовин нертә келн-улсин музейд секгдв. Керг-үүлдвр әрәсән олн-әмтнә зурач Ким Мергенович Ольдаевд нерәдгджәнә. Энүнд 40 һар көдлмш үзж болжана.
Хальмгин дүрслгч искусствин туужд Ким Ольдаев хамгин түрүн прфессиональн зурачин негнь болжана. Шин һәәхүлд музейин көрнгәс Ольдаевин дөчн тавн үүдәвр тәвгдв. Ким Ольдаевд энүнә авальнь ик дөн-түшг болсмн. Һәәхүл секлһнд орлцсн улсин келсәр, Валентина Ольдаева нерн туурсн зурачин үүдәлтин зөөриг иргч үйнрт хадһлж үзүлх саната.
Ким Ольдаевин аваль Валентина келсәр, эндрк һәәхүлд дүрслгч искусствд дурта улс болн Ким Ольдаевин үүдәлтиг сәәнәр меддг улс ирв. Эдн цугтан энүнә үүдәлтд дурта улс болжана.
Зурач Ким Ольдаев эврәннь цага нертә улсин болн олн-әмтнә баатрмудын, гражданск болн төрскән харсчг дәәнә ветеранмудын, сойлын болн спорты нертә үүлдәчнрин зургуд зурад, нерән туурулсмн. Тер тоод Хальмгин болн Әрәсән ачта артист Валерий Эрдниевин өрк-бүлин зург онц орм эзлжәнә.
Ким Ольдаевин найн жилин өөнин һәәхүлд энүнә элгн-саднь, өөрхн улснь, танһчин министерствсин-ведомствсин элчнр ирв. Министр Лариса Васильеван келсәр, Московск университетд тавдгч курст сурчасн кемд нертә зурачла харһад күүндх байрта саам учрв.
Тиигхд Москвад энүнә һәәхүл секгдсн билә. Москва балһснд болсн Советская Россия һәәхүлин хөөн, Ким Ольдаевин зурсн Калмычка нертә зург Әрәсән хотл балһснд олн улст таасгдв.
Эндр секгдсн һәәхүлд Ким Ольдаевин талдан үүдәвр Хозяин степи нертә зург олн улсин зүрк авлв. Зурач Эдуард Азыдовин келсәр, Ким Ольдаевин үүдәлт талдан зурачнрас йилһрнә. Энүнә зургуд өвәрц болн соньн.
Ким Ольдаев иргч үйнрт гүн учр-утхта болн ке-сәәхн зургуд үлдәв. Энүнә үүдәврмүд төрскн һазртан дуран өглһнә сурһмж өгчәнә. Иим искусствин үүдәврмүдәр давмжулж дорас өсж йовх баһчудт төрскнч сурһмж өгх кергтә болжана. Эн күүнә келсәр, зургт Көтчнрә района һазр зурата гиж медгднә. Йир соньн зург. Һәәхүл йир таасгдв, хальмгин нертә зурачин үүдәврмүдиг олн гиичнр хәләхәр ирв гиж күүкд күн темдглв.
Әрәсән олн-әмтнә зурачин ончта өөнд нерәдгдсн «В их лицах отражен 20 век» нертә һәәхүл өдгә цагин баһ наста зурачнрт болн хальмгин дүрслгч искусствд дурта цуг улст сән үлгүр үзмж болхнь лавта.
Ээнән Ольга, Очра Сергей
