Уйн наста каратистнрин марһан болв
Элст балһснд бичкдүд дунд межрегиональн каратэн марһан болв. Энүг Әрәсән наркоконтролин органмуд тогтасна арвн жилин өөнд нерәдгдв. Дөрлдәнд Астраханск, Волгоградск, Ростовск областьмудын болн хальмг танһчин бөкнр дииләчән йилһв.
Хальмг танһчин туг дор Өмн үзгин федеральн округин цуг субьектмудас хойр зун жирн уйн наста спортсмен зогсв. Марһан эклхин күләһәд, бичкн бөкнр икәр үүмжәхнь үзгдв. Эднә ик зунь иим ик чинртә дөрлдәнд түрүн болж орлцжана.
Марһанд орлцжах көвүд-күүкд йоста бөдүн улс кевтә ноолдх спортсменмүдин чидл үнлжәнә, болв эк-эцкнрәс болн тренермудас бичкдүд дөн күләв. Зурһан наста бөкнрт хамгин һол кергнь — йоста дәәчин занг үзүлж, ик теслттәһәр ноолдх кергтә. Шүүгдсн бийнь, бичкдүд эн өдр уульсн уга.
Марһана бүрдәһәчнр — танһчин наркоконтролин болн Хальмгин десантникүдин ниицәнә элчнрин келсәр, бчикдүдин бичкн цагасн авн спортд орулх кергтә. Энүнә төлә шишлнг таал бүрдәх төр тәвгджәнә. Хальмг танчар наркоконтролин церглтин ахлач Георгий Солдаткина келсәр, иим кеәвр наркоманля ноолдснь хамгин олз-туста керг болжана. Хөөннь чидләр эн му авьясла ноолдхд күнд болна. Баһчуд хорта тәмк олзлх дурн уга болх зөвтә. Зуг спортын нилчәр эдниг зогсаж болх. Тегәд Хальмг танһчд спортын делгрлтд ик оньг тусхагджана. Хальмгин десантникүдин ниицәнә ахлач Очр Халгаевин келсәр, наркотик олзлх әәмшг бичкн цагас авн учрна. Спортар олн бичкдүд соньмсхла, иргчдән эдн эрүл-дорул кевәр бәәж чадх. Бичкдүд — мана иргч болжана. Эдн ямаран улс болж өсхнь бөдүн улс даавр зүүх зөвтә.
Элст балһсна хөрдгч школын йисдгч классин сурһульч Сонан Бултуков каратэн секцд хойр жил хооран ирж. Школын өөр йовж йовад, генткн көвүд бөк бәрлджәсинь үзж. Тер цагас авн секцд орад, каратэн эрдм дасчана. Иргчдән сән үзмж бәрх саната. Ода алдр бөк Брюс Лииһас үлгүр авчана. Марһана орлцач Сонан Бултуковин келсәр, спортар соньмсх кергтә, каратэ йир сән спорт. Талдан чигн спорт бас сән нилчән күргнә. Наркотик олзлх керг уга, эрүл-мендән күн болһн эврән харх зөвтә.
Эн өдр уйн наста цуг спортсменмүд мөрәһәр ачлгдв, белгүд авцхав. Иим марһанд орлцснь бичкн көвүдт йоста диилвр болв.
Арстана Светлана, Ирчин Алексей
