Өдгә цагт Элст балһснд өмн үзгин болн деед-ар үзгин райодт хойр бичкдүдин сад тосхгджана. Социальн ик чинртә обьектмуд тосхлһна йовудыг бүртклһнә органмуд шинжлж хәләжәнә.

Хальмг танһчин правительствин тогтаврар, өнчн бичкдүдт болн эк-эцкин хәләвр уга үлдсн көвүд-күүкдт бәәдг гер яслһна төлә нег дәкж өгдг дөнцл мөнгнә зокал батлж авгдв.

Больницд ик чеерүдин төр электронн регистратурин эв-арһар халһгдх. Ода иим эв-арһар бичкдүдин поликлиникд кергтә эмчд бичүлж болх. Интернетын дөнгәр дурта цаглаһан кергтә эмчд орж болжана.

Амрлһна кемд сурһульчнр медрл авхан хайжахш. Хальмгин университетд Элст балһсна сурһульчнрин төлә немш келнә лагерь көдлв. Энүнә чилгчәр сурһульчнр иткүлин цаас авв.

“Россия 10” нертә марһана шүүврин девснгин аш диглх цаг күртл дигтә хойр долан хонг үлдв.

Элст балһснд электронн правительств цаарандан көдлжәнә. Хотл балһсна болн танһчин райодын әмтн гертәсн һарлго цуг кергтә зәнглһ авч чаджана.

Финансин-бюджетн церглт болн прокуратур долан залврин компань бүрткж шинжлв. Бүртклһнә ашт мөнгнә халхар олн дуту-дундс илткгдв. Энүнә туск материалмудыг танһчин прокуратурт орулж өгв.

Хальмгин правительствин тогтаврар, иргч дөрвн жилд Доступная среда нертә государственн программ батлж авгдв.

Эсвин предметар ЕГЭ-н шүүврин урдаснь кесн то-диг медгдв. Комиссин зәнглсәр, Әрәсән цуг регионмудт шүүврин закан эвдгдсн уга.

Хойрдгч тойгта бичкдүдин көгжмин школын сурһульчнр дәкәд нег ончта диилвр бәрв. Пятигорск балһснд Времена года нертә йисдгч нарта-делкән уйн наста билгтрин марһан болв.

Хотл балһсна хаалһд йоста машидын көөвр болв. Давсн амрлһан өдрмүүдт ДПС-н көдләчнр нег автомобилин ардас көөлдв. Машина залач госавтоинспекцин көдлчәнрин зогсх неквр күәчн уга.

Хальмг танһчд хаврин тәрә тәрлһнә көдлмш төгсв. Ут-тоодан намрин тәрәнә урһц дәкнәс тәрлһнә аһуг тоод эс авхла, хаврин культурмул далн минһн гектарт тәргдв.

Элст балһснд күндтә багш хармб Тензин Дугда гевшин санлд нерәдгдсн шажна тосхлт төгсжәнә.

Июнь сард баһчуд шүүврән өгдг цаг. Эн кемд оютнр болн сурһульчнр медрлән үзүлнә. Тер мет һазадын ордудас ирж сурчах көвдү-күүкд бас шүүвр өгчәнә.

Хаврин чилгчәр болн зунын эклцәр Элст балһсна болн хотл балһсна эргнд бәәх селәдин әмтнд иләсн йоста ик дәәсн болв. Кесг түмн хортн танһчин әмтнд ик зовлнг учрав.