Немш келнә лагерь сурһульчнрин төлә бүрдәгдв

Амрлһна кемд сурһульчнр медрл авхан хайжахш. Хальмгин университетд Элст балһсна сурһульчнрин төлә немш келнә лагерь көдлв. Энүнә чилгчәр сурһульчнр иткүлин цаас авв.

Татьяна Мудратова болн Алина Чурюмова Элст балһсна арвн доладгч школд сурчана. Ода эдн нәәмдгч класст орх. Энүнд күүкд һазадын орна келн гиж немш кел дасжана. Хальмгин университетин медлд үүлджәх зунын келнә лагерьт эдниг багшнь дахулж ирв.

Элстин арвн доладгч школын сурһульч Татьяна Мудратован келсәр, немш кел дурлж дасв. Мана лагерь Пеликан нертә телестудьт одла. Тенд зург цокдг дасхв. Олн-зүсн соньн тоот келж өгв.

Элст балһсна арвн доладгч школын нәәмдгч классин сурһульч Алина Чурюмован келсәр, сурһулин йовудт олн-зүсн буклет кедг эрдм таасгдв.

Лагерьт долан хонгтан немш кел дасхлһн олз-туста болв. Эн цагин туршарт сурһульчнр немшин сойлла өөрхн таньлдв, немш келәр Гете шүлгчин ду дасж авв. Сурһулин йовудт бичкдүд һазадын орна келнә гнү медрл авсн деерән, зург цокдг дасж авв, эврәнь олн-зүсн коллаж кедг дасв.

Хальмгин университетин германск филологин кафедрин доцент Татьяна Бураеван келсәр, сурһулин программла хамдан талдан чигн медрлин керг-үүлдврмүд бүрдәж давулгдв. Келнә сурһулиг университетин кафедрин номтнр күцәв. Бичкдүд деед сурһулин кафедрин көдлмшлә өөрхн таньлдв. Университетин музедй одв. Ода Әрәсәд хойр сай күн немш кел дасжана. Хальмг танһчд болхла немш кел дасжах улсин то бичкн.

Өдгә цагт англь келәр кү өврүлж болшго. Немш кел медсн күн эрдм-сурһульта болн сойлта күн гиж тоолгдна. Иигж эднә багшнрнь тоолжана. Сүл цагт Әрәсәд немш келн олн улс таасгддг келн боложана. Болв өдгә цагт энүг дасхд амр биш.

Хальмгин университетин гуманитарн кафедрин декан Василий Колодько келсәр, ода деерән мана танһчд немш кел дасх улсин то баһ. Эн туст көдлмш сәәнәр кех кергтә. Ода мана университетд оютнр немш келиг хойрдгч һазадын орна келн гиж дасжана. Ода эн халхар көдлмш өргдүлгдх. Танһчин оютнр һазадын ордудт одад дамшлтан өөдлүлнә. Нааран немшин номтнр иржәнә.

Тер бийнь немш кел дасхлһн оютнрт болн сурһульчнрт таасгджана. Иим кел дасхла иргчдән сән үзмж бәрж болх.

Хальмгин университетин германск филологин кафедрин доцент Эльза Дальдинован келсәр, келнә лагерьт сурһуль дассн көвүд-күүкд иткүлин цаас авцхав. Сурһулин ашт бичкдүд немш келәр буклет кеж һарһв. Эннь эднә көдлмшин сән аш болв. Келхд, келнә лагериг Герцена нертә институтын дөнгәр бүрдәв.

Елена Алексенко, Колдан Церн