Күндтә багш гевш Тензин Дугдан суврһн тосхгджана
Элст балһснд күндтә багш хармб Тензин Дугда гевшин санлд нерәдгдсн шажна тосхлт төгсжәнә. Гегән-гегәрлтин суврһнд Бурхн Багшин шүтән, Бурхн багшин номин харсачнрин шүтән, мирд, цаца, тәрн болн талдан чигн шажна предметмүд тәвгдв. Энүг Элстин цутхлнг хурлдын ламнр ном умшж әрүслв. Шин суврһн гевш Дугдан сурһульчнрин, буддистнрин болн эгл улсин орулж өгсн мөнгәр тосгджана. Эдн цугтан күндтә гевш Тензин Дугдан ик ханлтан өргжәнә. Гүн медрлтә Багш баһ наста гелнгүдт йоста сән үлгүр үзмж болв. Гевш Дугда Бурхн багшин әрүн ном-сурһулин күн болһн медүлхәр зүткж йовла. Энүнә аһу ик чинртх көдлмшин нилчәр, кесг минһ улс Бурхн багшин ном дасж, йоста буудистнр болж, һурвн эрдньд харул-хааһул авч чадв. Күндтә Багш цуг әмтә тоотвыг әрүн цаһан седклтәһәр харж хадһлх сана олн улст зүүлһв. Энүнә нилчәр кесг минһн әмтн өршәнһү цаһан седклтә болв. Сәкүсн сүмин аһуд тосхгдажх сурвһн байрин бәәдлд июлин арвн хойрла секгдх.
