Хуучн гермүдәс әмтн нүүлһхин төлә федеральн сангас мөнгн ирх

Хойр минһн арвн һурвдгч жилд хуучн нурад унжах гермүдәс әмт нүүлһнә төлә Хальмг танһч мөнгнә дөн авх регионмудын тоод орв. Энүнә нилчәр Элст балһсна арвн йисн герәс зурһан зун хөрн һурвн күн шин патьрт иргч жилд нүүж орхмн. Тер саамд танһчин райодын әмтн бас шин бүүрт орх чеерүдт зогсжана. Энүнә тускар соньмсад мана зәнгч Ик-Буурла районд одв.

Эн патьрт хорас хоорнд ик шуурһа һарв, орань нурад унжана, энгдән чиг хурж. Патимат Алисултанован келсәр, иим бәәцин таалд бәәхд амр биш болн әәмшгтә. Тегәд арһ уга һурвн хората хуучн нурад унжах патьран хаяд, хам-хоша бәәх герт нүүж орх кергтә болв. Эн хуучн гериг бас удл уга хольврх. Арһ уга эврәннь бичкдүдтәһән Патимат бәәдг гер уга үлдв.

Патимат Алисултанован келсәр, герин ораһас оньдин шавр унна. Ясвр кеһәд, муурад бәәв. Шалдад, цаһалһсна хөөн хәүр шавр унж ирнә. Ода тосхачнриг нәәмәдләд ясвр кев.

Энүнлә хам-хоша бәәх әмтн оньдин ясвр кех кергтә болна гиж зовлнгарн хувалцна. Өрк-бүлин бичкн бюджетас тосхлтын материал, тер тоод обои, шир болн талдан чигн материал хулдж авх кергтә болна. Поселкд бәәсн гермүд хуучн, энүг жирн нәәмдгч жилд тосхсн бәәж. Эн цагин эргцд гермүдин ора сольгдсн уга, хуучн гермүд зуг эздүдин нилчәр кесн ясврин нилчәр торчана.

Любовь Бурцикован келсәр, һурвн жил хооран ясвр кесн бәәж. Ода программд гер орсна хөөн ясвр кежәхш. Жил болһн ясвр кеһәд, дала мөнгн һарчана.

Тер саамд Ик-Буурла районд хуучн нурад унжах гермүдин то тавнд күрв. Зуг эдниг хойр жил болад хольвлж унһах. Ода болхла бәәрн йосна һардвр хуучн нурад унжах әмт нүүлһнә төлә цуг белдврин көдлмш кежәнә. Әмтнд өгх һазрин участкс йилһж авгдв. Энүнд нег давхрта әмтн бәәдг гермүд тосхгдхмн.

Ик-Буурла РМО-н администрацин толһачин дарук Александр Владимировин келсәр, олн патьмудта арвн герәс әмт нүүлһх кергтә. Ода хойр патьрта гермүдин төсв хәәжәнә. Дөрвн патьрта гермүд энд бәрж болшго. Кемр хойр патьрта гермүдин төсв эс олдхла дөрвн патьрта гермүд бәрх кергтә болх. Иргч жилд цуг ирсн мөнгиг олзлх санатавидн. Энүнә төлә районд цугнь белн болв.

ЖКХ-н сангас бюалһсна улсиг шин бүүрт нүүж орулһна төлә мана танһчд йирн зурһан сай арслнг йилһж өггдх. Тер мет танһчин бюджетас энүнә төлә бас мөнгн һарһж өггдхмн. Ут-тоодан хөрн долан сай арслнг ирх. Дәкәд болхла бас хөрн долан сай арслнг хотл балһсна хазнас йилһж өггдх. Тегәд иргч хойр минһн арвн дөрвдгч жилд Элст балһсна арвн йисн хуучн герәс әмтн нүүлһгдәд, шин патьр авх.

Танһчин ЖКХ-н болн энергетикин министр Нелли Ткачеван келсәр, ода хамгин олн хуучн гермүд Элтс балһснд бәәнә, тавн иим гер Приютное селәнд болн хойр хуучн гер Лаганьд бәәнә. Талдан селәдт цуг әмтн хуучн гермүдәс нүүлһв. Ода болхла хойр минһн күн хуучн гермүдәс шин патьрт нүүж орх зөвтә. Арһлачнрин тосхсн гермүд бас авх санан бәәнә. Кемр мана үн болн талдан чигн таал эднд ирлцхлә, иим гермүд авч болх.

Дәкәд нег тодлад кехлә, хойр минһн арвн доладгч жил күртл хуучн нурад унжах гермүдәс цуг әмтн нүүлһх зөвтә. Олн патьрмудта гермүдт капитальн ясвр кехин төлә арвн тавн сай арслнг йилһж өггдхмн. Тер мет энүнә төлә бәәрн бюджетас мөнгн ирх, тер мет эздүд бас эврәннь мөнгән орулж өгх. Энүнә ашт зурһан зун Элст балһсна әмтн шинрүлгдсн патьрт нүүж орх.

Ээнән Ольга, Ирчин Алексей