МЧС-ин харсачнр уснд чивсн улсиг харсж авхин тускар сурһуль кев
Усна көвәд амрчах улсин төлә шишлнг сурһуль бүрдәж давулгдв. МЧС-ин региональн заллтин харсачнр Колонск боодгин өөр уснд чивсн улсиг яһж харсж авхин туск эв-арһ үзүләд, уснд яһж бийән бәрхин тускар тодрхаһар келж өгв. Зеткртә йовдлмудас саглулһна тускар бичкдүдт ямаран селвгүд өггдв?
Өдрин дөрвн час. Колонск боодгин улс эн кемд хамгин олар ирж амрна. Нурһлж бичкдүд. Эднә зәрмнь эк-эцктәһән ирв, болв кесг көвүд-күүкд хәләвр угаһар өөмжәнә. Специалистнрин тоолврар, минь иим улс дундас зеткртә йовдлла олн әмтн харһна. Яһж уснд чивсн кү харсж авхин тускар харсачнр ил бичкдүдт үзүлв, бачм чинртә йовдлын цагт яһж бийән бәрхин тускар тодрхһаһар келж өгв.
Энүнә хөөн харсачнр келж өгсн медрлиг көвүд-күүкд яһж шингәж авсинь медхәр, наад бүрдәв. Арвн һурвн наста Руслан Калабеков уснд чивсн Антон Головатенког харсж авв. Эднә үзүлсн дамшлтар, харсачнрин өгсн медрл сәәнәр шингшж авч гиж келж болх. Эдн даалһвран сәәнәр күцәсн деерән, талдан чигн эв-арһ үзүлхәр седв. Уснд экләд чивсн цагт эргнд бәәсн улсин оньг тусхах кергтә. Эннь хамгин һол зокал болжана. Эн көвүнә келсәр, энүнә өмн уснд чивсн улсиг яһж харсхин тускар меджәсн уга бәәәж. Ода энүг тодлж авх кергтә. Уснд чивжәх күн нөдк болтн гиж дуудх зөвтә, уснд чивжәнәв гисн докья өгх зөвтә гиж эн көвүн келнә.
Күүкд болхла көвүдлә әдл биш, уснд чивжәх улсиг яһж харсж авхин тускар меднә. Болв хоршаж авсн медрлән бәәдл-жирһлд олзлж чаджахш. Уснд чивсн күүг залу улс харсж авх зөвтә гиж эдн тоолжана. Залу күн чидлтә болн баатрзөрмг болна. Уснас һарһж авсн күүнд арвн тавн дәкж искусственн кевәр ки орулх кергтә гиж эн күүкн келнә. Эн күүкнә келсәр, уснд чивжәх күүг ардаснь авх кергтә гиж зааж өгв.
Тер саамд Колонск боодгт зеткртә йовдлмудын то баһржахш. Специалистнрин келсәр, энд учрсн зеткртә йовдлмудт уснд чивсн улс эврән бийнь гемтә. Нурһлж әрк уусн залу лу суснд орад, чивж одна. Нег сәнь, эн жил зеткртә йовдлла бичкдүд харһсн уга.
Хальмг танһчар Әрәсән МЧС-ин заллтин харсач Андрей Донченко келсәр, иим керг-үүлдврмүдин һол күцлнь — бичкдүд, бөдүн улс уснд әәмшг угаһар өөмхин төлә кегджәнә. Зеткртә йовдлд туссн улст дөн күргж чадх зөвтә.
Эн өдрмүдт иим сурһуль харсачнр танһчин райодт бас бүрдәх саната. Эднә тоолврар, иим сурһуль болн селвгүд уснд амрчах улс зеткртә йовдлас гетлхд дөн болх зөвтә. Уснд амрчах улс, хамгин түрүнд уснд әәмшг угаһар өөмлһнә зокал медх зөвтә.
Ээнән Делгр, Хавтхна Анатолий
