Хальмгин бичкдүд Испаньд болсн фестивальд сән үзмж бәрв
“Салют талантов” тиим нертә нарта-делкән фестиваль Испань орн-нутгт болв. Энүнд һурвн тәвн һар үүдәгч коллектив орлцв. Теднә тоод хальмгин көгжмчнр. Эдн долан медаль шүүж авч чадв.
Марһана хамгин бичкн орлцач Ирина Хошаева. Эн билгтә бичкн күүкн зевсгүдин үүдәлт нертә номинацд билг-эрдмән үзүлв. Аштнь хойрдгч орм эзлв. Ирина домбр цокна. Хамгин баһ наста багд приезрмудын тоод орхин төлә арвн көгжмч дөрлдв.
Ирина Хошаеван келсәр, иим марһанд терн болж орлцжана. Һазадын орн-нутгт одсн йовдл йир байрта болв. Дөрлдәнә өмн невчк үүмәд бәәв. Болв сцен деер һархла үүмдгән уурв.
Айса Хечиева көгжмәр зурһан жилдән соньмсжана. Сул цагтан дурта эрдмәрн көдлхдән дурта. Зевсгүдин үүдәлтин номинацд бас хойрдгч ормд һарв. Тер мет Айса Байр ансамблин ханьд билг-эрдмән үзүлв. Эдн Аркадий Манджиевин “Ноһан Дәркин” би болн “Попурри” жюрин оньгт тусхав. Аштнь көвүд-күүкд негдгч девснгин лауреатын нер зүүв.
Айса Хечиеван келсәр, марһанд олн улс ирж орлцв. Болв бийдән иткәд, үүмсн уга. Диилвр бәрсндән икәр байрлв. Тер мет мана талдан артистнр бас сән үзмж бәрв.
“Байр” ансамбль танһчин, цугәрәсән болн нарта-делкән марһасин призермудын тоод кесг дәкж орла. Эдн Финляндин, Венгрин, орн-нутгудт, Парижд одла. Испаньд одсн йовдл ик байр үүдәв. Тер мет хамльгин бичкдүд Дрезден балһснд экскурсьт одв, Люксембург орн-нутг һәәхв, Диснейлендт одад олн-зүсн наад наадв. Эн күүкнә келсәр, ик деерәс Париж балһс һәәхв. Дегд сәәхн болв. Эднә одсн цуг балһсд таасгдв гиж эн келнә. Энүнә темдглсәр, порт Вентура таасгдв, олн-зүсн аттракционд одв. Диснейленд икәр таасгдв, олн-зүсн соньн наад үзв гиж эн күүкн келнә.
Хойрдгч тойгта көгжмин школын багш Любовь Дохаеван келсәр, иим фестивальмудын йовудт бичкдүд эврәннь билг-эрдәмн делгрүлнә. Хальмгин билгтнр һазадын ордудын улсиг хальмгин өвәрц сойлла таньлдулв. Эднә нилчәр олн әмтн мана келн-улсин уул авьяс-знгшалла өөрхн таньлдв.
Көгжмин школын багш Любовь Дохаеван келсәр, мана танһчин нериг көвүд-күүкд сәәнәр харсв. Өдр болһн гилтә белдвр кеж. Билг-эрдмән соньн кевәр үзүлхәр зүткв.
Ирчгдән уйн наста көгжмчнр дарани марһаст болн фестивальмудт орлцх. Ода болхла холл һазрас хәрж ирсн бичкдүд гертә зунын амрлһнд цогц-махмудан батрулжана.
Ээнән Делгр, Максим Мятежный
