Тәмк хайхин улсин төлә школ көдлжәнә

Элст балһснд эрүл-менд харлһна цутхлнгин улд тәмк хайх саната улсин төлә школ секгдв. Медицинск цутхлнгин специалистнрин тоолврар, жил ирвәс тәмк татдг улсин тө өсәд йовна. Олна һазрт тәмк татшго закан эн халхар бәәдл ясрулх зөвтә.

Элст балһсна бәәрн күн Вячеслав кесг жилдән тәмк татжана. Кесг жил хооран иим му авьяст орв гиж эн келнә. Маднла күүндсн цагт чигн һарасн тәмк хайжахш. Тәмк таддг авьясиг кесг дәкж хайхар седв, болв юмн болсн уга. Зуг тәмк дегд икәр үнтәрхлә, иим му авьясиг хайж болх гиж Вячеслав тоолжана.

Вячеславин келсәр, кемр нег пачк сигерет зун арслнг күрхлә, тиихлә тәмк татдган хайх. Тәмк хаяд һурвн сар болсна хөөн, дәкнәс му авьяст орв.

Тәмк дегд икәр үнтәрхлә, тәмк татдг улст күнд болх. Үлгүрнь, кемр нег пачк сигарет тәвн арслнг күрхлә, арвн жилдән тәмк татжах күн өдртән хойр пачк сигарет татхла, нег сардан һурвн минһн арслнг кергтә болх. Эннь өрк-бүлин бюджетин ик һару болх.

Элст балһснд одахн эрүл-менд харлһан цутхлнгин улд тәмк хайх саната улсин школ секгдв. Психолог Наталья Намысован келсәр, ода нааран дөн авхин төлә олн-зүсн наста улс иржәнә. Өдр ирвәс иим улсин то өсәд йовна. Эн күүкдин келсәр, эдн эврән тәмк татхш. Зуг нааран ирәд кесг жилдән тәмк татжах эврәннь нәәжнриннь төлә цәәлһвр авх саната. Психологин тоолврар, күн болһн эврән бийнь тәмк хайх сана зүүх зөвтә.

Эрүл-менд харлһан цутхлнгин психолог Наталья Намысован келсәр, тәмк хайх седклтә күн эврән хайх зөвтә. Давсн жилд нааран найн тавн күн ирв. Эн жил болхла зуг зурһан сарин эргцд жирн күн дөн авхар ирв.

Тәмк татдг улсин то өсәд йовна. Эннь һундлта. Эрүл-мендин цутхлнгин һардач Галина Очирова хойр минһн арвн негдгч жилд кесн социологическ сурлһна аш жиглв. Энүнә то-дигәр, ода Хальмг танһчин цуг улсас дөчн процентнь тәмк татна.

Эрүл-менд харлһна цутхлнгин һардач Галина Очирован келсәр, ода тәмк татдг баһчудын болн бичкдүдин то дегд ик. Эн халхар университетин оютнрин, школмудын сурһульчнр дунд сурлһ кеж. Цуг баһчудас һучн процентнь тәск татна. Ода эннь хурц төр болжана. Хойр минһн арвн тавдчг жилд тәмк татдг улсин то һучн тавн процентд баһрх зөвтә. Дәкәд тапвн жил болад хөрн тавн процентд баһрх зөвтә. Эн туст ик көдлмш күцәх кергтә.

Ода эмчнр тәмк хайхин төлә олн-зүсн эв-арһ зааж өгнә. Болв хамгин түрүн күн болһн дотран шиидвр авх зөвтә — тәмк татх эс гиж хайх.

Батан Санжирма, Бадмаран Владислав