Эндр Хальмг Ик сурһулин медлд «Инновационная Калмыкия» нерәдлһтә форум көдлмшән эклв.

Элст балһснд Хальмг Танһчин дотр-дундын министерствин әнгүдин хоорнд һар бәрлдж ноолдлһна турнир давв. Эн турнир цергә даалһвран күцәсн полицин ах лейтенант Немәш Беркасиновин санлд нерәдгдсн билә.

Келн улсин драматическ театрт режиссер Елена Иванован бичсн «Хорха —боорцг» наадна түрүн хәләвр давв. Эн наадн «Колобок» нерәдллһтә орс туулин кевәр үүдәгдсн билә.

Хальмг Танһчин Пенсион сангин көдләчнр селәд поселкд одж әмтнд дөн нөкдән күргнә. Давсн жилд эн церглтин көдләчнр өдгә цагин некврлә ирлцжәх оборудовань олзлад цәәлһврин көдлмш күцәһәд олн улст дөнгән күргв.

14-гч цуг Әрәсән хөөдин һәәхүл көдлмшән цааранднь давулжана. Элстүр орн -нутгин арвн долан регионмудас тохма хөд авч ирв. Эн һәәхүлд хөрн һурвн тохма хөд күн болһн үзж чаджана.

Йирн жилин өөнән Цаһан нуурин багш Эрнджен Хазыкович Мутляев темглв. Эн ончта өөнләнь эврәннь багшан йөрәхәр олн сурһульчнр болн багшнр ирв.

Машиндән бичкдүдән суулһхларн маши залачнр әәмшг уга эв арһ зүүлһх зөвтә. Эндр полицин көдләчнр Элстин хаалһст һарад маши жолачнриг зогсаһад бүртлһнә көдлмш күцәв.

Троицк селәнә 52 олн үртә өрк-бүл һазрин участкс авв. Целинн района администрац энүнд нерәдгдсн йоста нәр бүрдәв. Эн керг-үүлдврин йовудт соньн концерт болв, бичкдүдт әмтәхн хот өгв.

14-гч цуг Әрәсән хөөдин һәәхүл көдлмшән цааранднь давулжана. Элстүр орн -нутгин талдан регионмудас тохма хөд авч ирв.

Элстд сурһульчнр дунд “ Безопасное колесо” нертә балһсна марһан давв. 10-12 наста көвүд-күүкд хаалһин закаг яһж меддгән үзүлв.

Нарн өдрлә негдгч тойгта бичкдүдин көгжмин училишин сурһульчнр эн жилин товчлгч концертан үзүлв. Концертин йовудт йилһән сәәнәр сурһулән чиләсн көвүд күүкдиг күндллһнә һашгар ачлв.

Эн өдрмүдт Аһшин областьд минһн нәәмн зун арвн хойрдгч жилд болсн алдр дәәнд диилвр бәрсн хойр зун жилин өөнд нерәдгдсн керг үүлдврмүд давжана.

Элст балһсна “Уралан” — нертә стадионд хальмг цәәд нерәдгдсн байр болв. Ик кезәнәс авн мана өвкнр цәәһәр дееж өрж , бурхндан зальврж , гиичнриг шинкн чансн халун цәәһәр тосна.

Үстин района Цаһан Амн селәнд март сарин 4 геедрж одсн Максим Сидоровин цогциг бачм дөн күрглһнә әнгин көдләчнр хойр метрин гүүнә нүкнд олж авв.

Элст балһснд сурһульчнр дунд цуг Әрәсән президентск спортивн наадна танһчин девсн давулгджана. Эн марһан мана орн-нутгт баһчуд дунд эрүл-менд бәәдл-жирһлд тахралһна төлә 2 жил дарандан кегджәнә.