Амр Санана төрснә зун хөрн тавдгч жилин өөн күцв

Эн өдрмүдт мана танһчд хальмгин литературин ул тогтасн бичәч Антон Амр Санана зун хөрн тавдгч жилин өөн темдглжәнә. Энүнә нер зүүжәх хальмгин келн-улсин библиотект нертә бичәч, олна болн государственн үүлдәчин жирһлин хаалһд болн үүдәлтд нерәдгдсн керг-үүлдвр болв.

Антон Амр Сананыг “Мудрешкин сын” нертә роман бичсн бичәч гиж меднә. Санлын асхнд орлцсн сурһульчнр эн бичәчин тускар тас медхш. Зуг "Мудрешкин сын" романиг меднә. Ода школьн программд бичәчин үүдәлт дасхлһна төлә шишлнг кичәлмүд болна.

Бичәчин үүдәврмүд медхш гиж эн келнә. Энүнә келсәр, “Мудрешкин сын” роман умшв. Эннь орс келәр түрүн үүдәвр болв.

Амр Санана үлдәсн литературн зөөр ода күртл ик чинр зүүжәнә. Энүнә үүдәврмүд олн-зүсн сурвмудт хәрү өгнә, бәәдл-жирһлин тускар гүн уха тунһах сана өгнә. Эврәннь үүдәврмүдтән бичәч эврәннь төрскн һазрин иргчин тускар бичв. Амр Санана бичсн Арнзл, Теегт нертә түүк болн талдан чигн үүдәврмүд иим күцлтәһәр бичгдв. Мудрешкин сын нертә роман хальмгин литературин ул болсн үүдәвр болжана. Нег минһн йисн зун хөрн тавдгч жилсә авн арвн жилин эргцд орс келәр эн үүдәвр дола дәкж барлгдв. Харм төрхд, бичәч эврәннь үүдәврән хальмг келнд орчулж чадсн уга. Иим көдлмш Хальмг танһчин олн-әмтнә шүлгч Инжин Лиж күцәж чадв.

КИГИ РАНа номин көдләч Бичән Баазрин келсәр, кемр Антон Мудреновичин роман умшх саната улс, түрн һарцин умшх зөвтә. Юнгад гихлә һарц болһн әдл биш. Эдн йилһрнә. Романд өвәрц бичәчин хәләц үзүлгджәнә. Тер цагт бәәсн күүнә хәләц тер цагин туужиг медүлжәнә.

Әрәсәд болсн хүвслһнә цагт хальмг танһчин тууж эклсн кемд олна үүлдәч болн бичәч шунмһаһар орлцад, мана танһчин автономь бүрдәлһнд ик тәвцән орулсмн. Арш Чапчаевла, Ока Городовиковла болн Харти Кануковла хамдан Хальмгин автономин ул тогтав. Ода Городовиковск районд Амр Санана нер зүүжәх селән бәәнә. Эн һазрт хальмгин литературин ул тогтасн бичәч Антон Мудренович бәәршлсмн. Эн өдрмүдт бичәчин төрскн һазрт ончта өөнин байрин керг-үүлдврмүд болжана.

Танһчин толһачин медлд үүлджәх олна хүүвин ахлачин дарук Санжин Арслнгин келсәр, Амр Санан хальмгин Максим Горький болжана. Энүнә бичсн Мудрешкин сын нертә романиг нертә бичәчнр дурлж умшдг бәәсмн. Максим Горькийн үүдәлтлә дүнцүлхлә, Амр Санана үүдәлт әдл болж медгднә. Романд улсин күнд бәәдл-жирһлин тускар келгджәнә. Энүнд хар эгл улсин тускар бичгдв.

Танһчин нертә бичәчәин эн зургиг дөчн тавн жил хооран зурсн бәәж. Зурач Һәрә Рокчинский хальмг улсин хәәртә үрн болн билгтә бичәчин дүр чик кеәвр үзүлхәр зүткв. Рокчинскийн күүкн искусствоведеня доктор Светлана Батырева зург хурсн цагт арвн нәәмтә күүкн бәәж. Эн үүдәвр яһж зурсна тускар ода күртл сәәнәр тодлна.

Светлана Батыреван келсәр, туужин санл мадниг унг-тохминнь тускар санх неквр тәвнә. Эннь йир соньн сурврмуд болжана. Күн болһн иим сурвр бийдән өгнә. Жирдгч жилмүдт зурачнр бас иим сурврт хәрү өгхәр зүткв. Эдн хальмг улсин тууж сергәж өгх саната бәәж.

Бичәчин жирһлин хаалһ адрута болн күнд болв. Һучн доладгч жилин август сард энүг худлар гемшәһәд, түүрмд суулһв. Һучн нәәмдгч жилд хаж алсмн. Хөөннь энүнә нерн цеврлгдв. Амр Санана ончта өөнд архивн материалмуд олгдв. Энүнә дөнгәр бичәчин литературн зөөр шинәс шинжлж болх.

Ээнән Ольга, Хулхачин Николай