Дошкольн эрдм-сурһулин көдләчнрин сән өдр темдглгджәнә

Цаһан седклтә, күч-көлснд шунмһа болн теслттә улс гиж эднә тускар келж болх. Эндр дошкольн эрдм-сурһулин көдләчнр эрдмин сән өдрән темдглжәнә. Ода Әрәсәд жирн минһн бичкдүдин сад бәәнә, энүнд нег сай һар сурһмжлач көдлжәнә.

Надежда Степановна Богославская насни туршт багшлж йовна. Дошкольн эрдм-сурһулин халхар һучн тавн жилдән көдлжәнә. Дамшлтта багш бичкдүдт эсвин эрдм болн умшдг сурһуль дасхна. Көвүд-күүкдлә медрлин кружокт көдлжәнә.

Бичкдүдин садын сурһмжлач Надежда Богославская келсәр, кичәлмүдтән олн-зүсн блокмуд олзлнавидн. Цуг наадд болн дасхл гүн медрл авхин төлә кегджәнә. Тегәд школд белдвр кехин төлә көвүд-күүкд сән медрл болн дамшлт авчана.

Богославская келсәр, бичкдүдлә көдлхлә чидл ирнә, оньдин чанһ-чиирг кевәр бийән бәрхд сән нилчән күргнә.

Наталья Богославская келсәр, шүүж авсн эрдм насни туршт дурта көдлмш болв. Көдлмштән цуг чидлән өгчәнә. Һучн тавн жилдән бичкдүдин садт көдлснь амр керг биш. Дурта көдлмш угаһар бәәж чадшго.

Сурһмжлач көдлмшән седклән өгәд кехлә, бичкдүд бас эврәннь халхасн багшан дурлх. Көвүд-күүкд бичкдүдин садт одхдан йир дурта, багшан күндлнә. Өсхләрн бичкн цаган ик байрта цаг гиж тодлна. Һурвн наста Чингис Ямановин келсәр, бичкдүдин садт одхдан икәр дурлна. Энд талдан көвүд-күүкдлә наадна, ду-би дасж авна. Иим нег шүлг мана үүдәгч багд умшж өгв.

Федеральн болн муниципальн бюджетмудын мөнгәр шин мебель хулдж авгдв, зәрм багмудын хораст шин терз-үүдн углж тәвгдв, дула өглһнә систем шинрүлгдв, һаза бичкдүд наадг плошадк ясгдв. Келхд, эн жил дошкольн учрежденьд һучн ормта немр баг секгдв. Энүнд унтлһна хора бәәнә, багин хорад ясвр кеж. Дошкольн учрежденя һардач Анна Болдыреван келсәр, урднь энүнд театральн болн дүрслгч искусствин студь бәәсмн.

Дошкольн учрежденя көдләчнр бичкдүдт чик сурһмж өгхәр зүтксн деерән, ухата болн чанһ-чиирг улс өскхәр зүткжәнә. Бичкдүд мана орн-нутгин иргч болжана.

Баира Петрова, Хулхачин Николай