Оютнр олн-әмтнә хуралд одв

Теегин йосна бичгин сән өдрин өмн өргнд Хальмгин университетин оютнр танһчин олн-әмтнә хуралд одад, депутатнрла болн хуралын ахлачла күүндв. Юристын эрдм дасжах баһчудын сурврт Анатолий Козачко тодрха хәрү өгв.

Анатолий Козачко келсәр, оджа парламентд сән юристнр кергтә. Эн көвүд-күүкд Хальмг танһчин олн-әмтнә хуралын сүүрин залд түрүн болж ирв. Юристнрнин эрдм дасжах оютнр закад батлж авдг һазриг эврәннь нүдәрн үзв. Иим закаһар мана танһч делгрлт авчана.

Көвүд-күүкд депутатнрин көдлдг орм хәләһәд, зәрмнь депутатнрин суудлд сууж үзв. Олн-әмтнә хуралд көдлхин тускар ухалад угавидн гиж баһчуд келнә. Оютнрин ик зунь прокуратурт көдлх саната. Закан яһж күцәгджәхинь бүткхин төлә, иим зака чик кевәр батлж авад, энүг сәәнәр белдх кергтә. Депутатнрин батлж авсн закан Әрәсән системла ирлцх зөвтә. Энүг танһчин парламентин зөвин әнг хәләж бүрткжәнә.

Хальмгин олн-әмтнә хуралд болсн экскурсиг баһчуд удандан тодлж мартшго. Хальмгин университетин хойрдгч курсын оютн Геляна Бембееван келсәр, олн-әмтнә хуралын герт түрүн болж ирв. Энд көдләчнрин төлә сән таал бүрдәгдж.

Танһчин парламентин ахлачла болсн бүлән күр-күүндвр баһчудт таасгдв. Күүндвин чилгчәр оютнр Козачкод эмәлго сурврмуд өгв. Үлгүрнь, государственн церглтин көдлмшт орхла ямаран стаж кергтә тускар оютнр соньмсв. Ода эн неквриг зогсахин тускар танһчин зака депутатнр одхан батлж авла. Парламентин ахлач Анатолий Козачко келсәр, нааран ирсн баһчуд шунмһа оютнр. Эдн юридическ кружокд орна. Тегәд эдн хуралын көдлмшәр соньмсжана. Хальмг танһчин төрскнч улс болж өстхә. Темдглсн күцлдән күрх болтха. Ах үйнр болхла эднд дөн түшг болх зөвтә.

Юристнрин эрдм дасжах оютнрла олн-әмтнә хуралын депутатнр Теегин йосна бичг батлж авсн өдрин өмн өргнд харһлт кеснь онц темдгтә чинр зүүв.

Хавтхна Элла, Хавтхна Анатолий