Хальмгт экспедиц кегджәнә
“Алдр тег — сойлын болн хаалһсин ниилвр”. Иим нертә экспедиц хальмг танһчд болжана. Энүнә орлцачнр нег минһн дуунад йовх. Экспедицин гешүд кесг сардан мана танһчин болн хам-хоша бәәх регионмудын аһуһар давж һарх. Энүнә йовудт экологическ төрмүд хаһлгдх, номин шинжлтыйн көдлмш кегдх, туристическ маршрутмуд темдглж авгдх. Экспедициг осрин географическ ниицәнә дөннжәнә.
Эн жилин зунар Үстин района Бергн селәнәс темәдин болн мөрнә экспедиц һарч йовсмн. Эн цагин эргцд энүнд орлцачнр дагестана болн Астраханск областин аһуд күрв. Экспедицд тавн күн оржана. Эдниг дамшлттта зүүльчлач Юрий Сангдажиев һарджана. Экспедицин орлцанр олн-зүсн археологическ бумб болн сойлын обьектмуд хәләв, шин туристическ маршрут темдглж авв. Иим походын туужд түрүн болж экспедицд зуг мана танһчин әмтн орлцжана. Эдн цугтан туужд болн төрскн һазрин сойлд дурта улс болжана.
Экспедицин орлцачнр болн Үлмж Мукабеновин келсәр, мана уул сойл босхж авсндан байрта бәәнә. Темәһәр йовхла, әмтн соньмсад хәләнә. Икәр өврнә. талдан регионмудын улс икәр өврнә. Эднд бичкдүд кевтә байрлна. Руслан Нужановин келсәр, темән оньдин мадна өөр бәәнә. Талдан улст байр болхла, маднд эгл көдлмш болжана.
Өдр болһн темәдин болн мөрнә караван кесг дуунад йовна. Походн лагерьт хойр палатк, газин беш, дулан унтдг мишкүд болн хот-хол бәәнә. Зуульчлһнд цуг кергтә тоот бәәнә. Эднә һардач Юрий Сангаджиевин келсәр, эннь этнографическ экспедиц болжана.
Экспедицин һардач Юрий Сангаджиевин келсәр, ода мана экспедиц Хар һазра заповедникд күрәд ирв. Ода хойрдгч девснгд Элст балһснд күрх зура бәәнә, Энүнә хөөн Маныч нуурт күрхвидн, дарунь Цаһан Нур селәнд одх санан бәәнә.
Келхд, караванн экспедицд күн болһн орлцж чадх. Ода энүнә ханьд танһчин әмтн болн һазадын ордудын зуульчлачнр оржана. Энүнә йовудт дамшлтта номтнр номин болн шинжлтын көдлмш күцәжәнә.
“Алдр тег — сойлын болн хаалһсин ниилвр”. Иим нертә экспедицин йовудт олн-зүсн күцл тәвгджәнә. Тер тоод нүүдлин улсин тогтсн бәәц болн авьяс, экологическ туризмин делгрлт, номин шинжлтын көдлмш, зерлг ан-шовудыг шинжлһн, Хальмгт һазр көдәрлһнә төрмүдт оньган тусхалһн болжана.
Бевина Мергн, Ирчин Алексей
