Төрскн кел хадһлж босхлһна күцлтәһәр Элстин цутхлнг хурлд хальмг келнә сурһуль өнгәр күцәгдх

Төрскн кел хадһлж босхлһна күцлтәһәр Элстин цутхлнг хурлд хальмг келнә сурһуль өнгәр күцәгдх. Бурхн Багшин Алтн сүмд хальмг кел дасх саната цуг улс ирж чаджана.

Англь келнә багш Надежда Акимова хамгин түрүнд хальмг келнә сурһульд ирв. Төрскн келән дасж авхар ик кезәнәс авн ухалжасн бәәж. Надежда Акимован келсәр, энүнә өвкнрнь хальмг келәр сәәнәр күүнддг билә. Эднәс хальмг улсин амн үгин зөөрлә өөрхн таньлдв. Надежда Акимован келсәр, хальмгуд цугтан төрскн келән медх зөвтә.

Акимован тоолврар, энд хальмг кел дасхлһна эв-арһ таасгдна. Багшин өгсн даалһвр тодлж авхд амр, тодрха сән келәр цәәлһвр өггднә. Нааран олн-зүсн улс ирнә, медәтә әмтнлә хамдан баһчуд олар ирдг болв. Эднд цугтаднь онц оньг өггдж, сурһуль дасхгдна.

Иим кевәр сурһуль дасхла болн энүн деер номин литератур олзхла келн түргәр дасж болна. Элстин цутхлнг хурлд ирәд, төрскн кел дасжах улсин келсәр, ахр болзгт эдн хальмг келәр хоорндан күүнддг болв. Хурлд көдлжәх Жанһр Уташов хйор дәкж иим сурһульд орв. Түрүн кичәлд ирхләрн эрк биш хальмг кел дасж авх күцл тәвсмн. Энүнәкөдлмшт төрскн келн кергтәболна. Ода баһчуд экин келәр келдән уурв гиж Жанһр икәр үүмжәнә. Жанһр Уташовин келсәр, нааран ирсн ээжнрлә хальмг келәр күүндхд ик байрта болна.

Хоорндан хальмг келәр күүндхлә, чееж сергнә гиж Жанһр келнә. Ода Жанһр цаарандан чигн иим сурһульд орад, төрскн келән сәәнәр медж авх саната.

Азыда Надежда, Дукмана Николай