Бичкдүдин бииһин «Тюльпанчик» ансамбль Москва балһснд болсн цугәрәсән марһанд орлцла
Бичкдүдин бииһин «Тюльпанчик» ансамбль Москва балһснд болсн «Во имя жизни на земле» нертә цугәрәсән марһанд орлцад, түрүн хойр орм эзлв, гран-при шүүж авв. Марһанд хөрн тавн бичкдүдин коллектив орлцв. Хальмгин бичкдүдин билгиг Әрәсән сойлын болн искусствин нертә үүлдәчнр өөдәнәр үнлв.
Эн зургт келн-улсин йилһән сән Тюльпанчик ансамблин орлцач Надежда Бамбышева концертд орлцад биилжәнә. Марһан билгтә биич “Шапочка” нертә би бииләд, онц бииһин номинацд түрүн орм эзлв. Эн күүкн даолан жилдән ансамбльд биилжәнә. Ода Элстин искусствин училишин бииһин әнгд сурчана. Иргчдән дурта эрдмән цуг арһ-чидлән өгч, Москван сойлын болн искусствин государственн университетд орх саната. Надежда Бамбышеван келсәр, арвн жил хооран бииһин эрдмәр соньмсдг болв. Би биилхдән йир дурта. Людмила болн Евгений Толкачевихн сән дамшлт өгв.
Тюльпачник ансамблин биилсн хальмг улсин би, тер тоод Небесные девы, Чичрдг болн Ишкмдг би олн улсин зүрк авлв. Бичкдүдин коллектив Әрәсән олн-зүсн марһаст орлцад, сән үзмж бәрнә. Тер мет нарта-делкән марһаст бас орлцад, олн ачлврмудар ачлгдсмн. Иим дөрлдәнд орлцхла, талдан келн-улсин сойлла өөрхн таньлдж болна. Молдавск би йир таасгдна. Талдан коллективмудыг үзвидн. олн соньн әмтнләтаньлдв. Ода бидн би угаһар бәәж чадшговидн. Мана жирһлин хаалһд би һол орм эзлжәнә.
Тюльпанчик ансамблин художественн һардач Людмила Толкачеван келсәр, иим марһанд орлцад, бичкдүд үүдәлтин йоста байрт орлцв. Людмила Толкачеван келсәр, иим марһас көвүд-күүкдт сән урмд өгнә. Талдан келн-улсин би дасж авна, эврәнь келн-улсин би үзүлнә. Иим ик чинртә марһанд орлцхин төлә тохнята белдвр бичкдүд кенә.
Москвад болсн марһанд олн келн-улс эврәннь сойлан үзүлв. Энүнәйовудт бичкдүд Әрәсән хамгин сән билг-эрдм шингәж авсмн. Ирх амрлһна өдрмүдт Элст балһсна әмтн болн гиичнр Нальчик балһсна бииһин би ийлһнәсән “Нальцук” нертә коллективин болн “Тюльпанчик” ансамблин хамцу концерт хәләж чадх. Иим хамцу концерт түрүн болж бүрдәгджәнә. Энүнә хөөн хальмгин бичкдүд Нальчик балһснд билг-эрдмән үзүлх.
Ээнән Делгр, Дукмана Николай
