Хальмг танһчин туужиг зурачнр эврәннь үүдәврмүдтән үзүлжәнә
Эндр өдрмүдт Пальмовин нертә келн-улсин музейд «Палитра истории» нертә һәәхүл секгдв. Энүг хәләсн улсин тоолврар, энд ке-сәәхн зургуд тәвгдж. Олн-зүсн зурачнрин үүдәврмүд хәләхд соньн болна. Хальмгин дүрслгч эрдмлә өөрхн таньлдх арһ элстин улст болн гиичнрт учрв. Мана үүдәгч баг шин һәәхүлиг бас хәләв.
Зурһадгч классин сурһульчнр Дорж Олиев болн Виктор Сомьянов шин һәәхүлд ирәд, төрскн һазриннь туужла өөрхн таньлдх саната. Эднә келсәр, зурачнр эврәннь үүдәврмүдтән хальмгин тууж сәәнәр үзүлж. Элст балһсна бичкн уульнцс болн архитектурн бумб үзж болх.Уйн наста көвүдин тоолврар, жил ирвәс мана хотл балһсн кеерәд, сәәхрәд йовна. Элст урднь ямаран бәәсн тускар медж авв гиж эн көвүн келнә. Нанд Рокчинский зурсн Журавлиная песня үүдәвр таасгдв. Энүнд мана теегт урһдг цецгүд, бамб цецг йир сәәхн кеәвр зургдж, тоһрун нисж ирсндән байрлжана гиж эн темдглв.
Шин һәәхүлд зургуд, графикин үүдәврмүд, скульптур болн урн һарин эрдмин кегдлмүд тәвгдв. Ут-тоодан зу шаух экспонат бәәнә. Эдн цугтан олн-зүсн бәәдл үзүлжәнә. Үүдәгч улс цугтан эврәннь төрскн һазртан, әмтнд болн йиртмжд дуртаһан медүлжәнә.Үлгүрнь, хальмгин нертә зурая Гәрә Рокчинскийн “Сказ о Монголии” зургт нег-сахн цусн улсин тускар үйджахнь медгдв. Алексей Куськиевин үүдәсн Хальмгин хотна байр зургт мана келн-улсин уул өвәрц сойл үзүлгджәнә. Владимир Ошлановин “Ночь в кибитке” нертә үүдәврт моднас, арснас болн хүрсхәс нәәрүлж кесн кегдлмүд орв. Эн көдлмш талдан үүдәврмүдәс өвәрц болж үзгдв.
Пальмовин нертә музейин номин көдләч Виктория Босхаеван келсәр, шин һәәхүлин Палитра истории гисн нерн бас учрта. Энүг хәләсн улс давсн зун жилин болн өдгә цагин көдлмш үзж чаджана. Зурачнр эврәннь төрскн һазртан, Элст балһсндан ямаран энкр бәәсинь медж болхмн.
Виктор Дорджиев яснас олн-зүсн ке-сәәхн кегдлмүд кеж һарһв, тер тоод бичкн хәәрцг, дөөв, хан болн хатн олна оньг авлжана. Һәәхүлд тәвгдсн экспонат болһн хальмг улсин өвәрц туужла болн сойлла өөрхн таньлдулжана.
Ээнән Делгр, Очра Сергей
